សារព័ត៌មាន នគរវត្ត តែងតែនាំមុខគេជានិច្ច
មជ្ឈមណ្ឌលស្រាវជ្រាវ Gamaleya របស់រុស្ស៊ី បានប្រកាសថា បានត្រៀមលក្ខណៈដើម្បីចាក់វ៉ាក់សាំង Sputnik V ជូនប្រធានាធិបតីអាមេរិកដូណាល់ ត្រាំ ប្រសិនបើលោកយល់ព្រម។
ប្រធានមជ្ឈមណ្ឌលស្រាវជ្រាវ Gamaleya លោក Alexander Gintsburg បានឲ្យដឹងថា លោកបានផ្តល់មតិដល់មន្ត្រីអាមេរិកឲ្យចាក់វ៉ាក់សាំងការពារកូវីដ-១៩ Sputnik V របស់រុស្ស៊ី ។
លោកបន្តទៀតថា ជារឿងដ៏ល្អប្រសិនបើ លោកត្រាំព្រមចាក់វ៉ាក់សាំងបង្ការពីរុស្ស៊ី។
ប្រធានាធិបតីរុស្ស៊ី លោកពូទីន ក៏បានជូនពរប្រធានាធិបតី ដូណាល់ ត្រាំ ឲ្យបានឆាប់ជាសះស្បើយដែរ។ លោកពូទីនបានបង្ហាញពីការគាំទ្រ ចូលរួមយ៉ាងស្មោះក្នុងពេលដ៏លំបាកនេះ។
មុននេះប៉ុន្មានម៉ោង ប្រធានាធិបតីរុស្ស៊ីបានផ្ញើលិខិតទៅកាន់ប្រធានាធិបតីត្រាំ ថា «ខ្ញុំសង្ឃឹមថា សុខភាពរបស់លោកល្អប្រសើរ និងស្មារតីរឹងមាំ ហើយឆាប់យកឈ្នះលើជំងឺនេះ»។
លោកត្រាំក៏បានបញ្ជាក់ផងដែរថា លោក និងភរិយា គឺបានធ្វើចត្តាឡីស័កនៅសេតវិមាន ។ ជាមួយគ្នានេះដែរ សេតវិមានក៏បានប្រកាសផ្អាករាល់ដំណើរការឃោសនាបោះឆ្នោតរបស់ប្រធានាធិបតីត្រាំ ។ ចំណែកភរិយាលោកត្រាំ ក៏បានផ្អាករាល់សកម្មភាពនានាផងដែរ៕ដោយ៖ធី រីណា
