សារព័ត៌មាន នគរវត្ត តែងតែនាំមុខគេជានិច្ច
មន្ត្រីប៉ូលិស៣រូបនៅក្នុងទីក្រុងបាងកក ប្រទេសថៃ កាលពីថ្ងៃទី១៥ខែតុលាត្រូវបានផ្អាកការងារ ដោយសារតែមិនអាចបំពេញភារកិច្ចបានល្អ ទុកឲ្យក្បួនព្រះទីនាំងរបស់ព្រះមហាក្សត្រ ប្រឈមនឹងក្រុមបាតុករ ។
គេហទំព័រKhaosod បានផ្សាយថាប៉ូលិសដែលត្រូវផ្អាកការងារគឺ ស្នងការរងប៉ូលិសទីក្រុងបាងកក លោក Somprasong Yenthuam, ទីពីរគឺលោកPrasai Jittasonthi មេបញ្ជាការក្រុមទីមួយនៃស្នងការដ្ឋានក្រុងបាងកកនិងទី៣គឺលោកManop Sukonthanapat មេបញ្ជាការសន្តិសុខ និងគ្រប់គ្រងការប្រមូលផ្តុំគ្នា ។
នៅក្នុងសេចក្តីប្រកាសរបស់ស្នងការប៉ូលិសជាតិថៃ មិនបានបញ្ជាក់ពីមូលហេតុនៃការផ្អាកការងារនោះឡើយ ។
ប្រភពព័ត៌មានបានឲ្យដឹងថា មន្ត្រីទទួលខុសត្រូវទាំង៣រូបបំពេញភារកិច្ចមិនបានល្អ ត្រូវទទួលទណ្ឌកម្ម គឺផ្អាកការងារមួយរយៈ។ មន្ត្រីទាំងនោះមិនអាចបំបែកក្រុមបាតុករនៅតាមផ្លូវ Phitsanulok ពេលក្បួនព្រះទីនាំងព្រះមហាក្សត្រថៃឆ្លងកាត់ទីនោះ កាលពីថ្ងៃទី១៤ខែតុលា។
ក្បួនព្រះទីនាំងដឹកព្រះមហាក្សត្រនិងព្រះមហេសីSuthida ព្រមទាំងរាជបុត្រ Dipangkorn Rasmijoti ទៅកាន់ទីតាំងធ្វើពិធីសាសនានៅតំបន់ Wat Arun បានជួបជាមួយក្រុមបាតុករនៅតាមដងផ្លូវ Phitsanulok។ នៅពេលនោះ កម្លាំងប៉ូលិសបានឈរធ្វើជារនាំងដើម្បីឲ្យក្បួនព្រះទីនាំងព្រះមហាក្សត្រឆ្លងកាត់ ។
ហេតុការណ៍ទាំងនោះបានធ្វើឲ្យ នាយករដ្ឋមន្ត្រីថៃ លោកប្រាយុទ្ធចាន់អូចា សម្រេចចេញបញ្ជាដាក់ទីក្រុងបាងកកក្នុងគ្រាអាសន្ន ដើម្បីទប់ស្កាត់ការជួបជុំគ្នាលើសពី៥នាក់ ។ ប៉ុន្តែក្រុមបាតុករនៅតែបន្តធ្វើបាតុកម្ម មិនខ្វល់ពីច្បាប់ហាមប្រាមនោះឡើយ៕ដោយ៖ធី រីណា
