សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលថៃនៅថ្ងៃទី១៩ ខែតុលានេះបានប្រកាសថានឹងការពាររបបរាជានិយម ក្រោយពេលមានបាតុកម្មជាច្រើនកើនឡើងនៅទីក្រុងបាងកក និងខេត្តក្រុងជាច្រើនផ្សេងទៀតប្រឆាំងរដ្ឋាភិបាលនិងកែទម្រង់រដ្ឋធម្មនុញ្ញ កាត់បន្ថយអំណាចរបស់ព្រះមហាក្សត្រ។
បើទោះបីរដ្ឋាភិបាលចេញច្បាប់គ្រាមានអាសន្ន ហាមប្រាមជួបជុំគ្នាលើសពី៥នាក់ ប៉ុន្តែក៏មានបាតុករជាង១ម៉ឺននាក់ជួបជុំគ្នា កាលពីថ្ងៃទី១៨ ខែតុលាកន្លងមក ក្នុងទីក្រុងបាងកក។ បាតុកម្មធ្វើឡើងនៅជុំវិញវិមានជ័យជម្នះក្នុងរាជធានីបាងកក។
មានប្រសាសន៍នៅក្នុងវិមាននាយករដ្ឋមន្ត្រីនាថ្ងៃទី១៩ខែតុលា លោកប្រាយុទ្ធ ចាន់អូចា បានលើកឡើងថា លោកបានសម្រេចគាំទ្រ ការសម្រេចរបស់រដ្ឋសភាដែលបានកោះប្រជុំជាបន្ទាន់ ពិភាក្សាពីការធ្វើបាតុកម្មរបស់ក្រុមនិស្សិត ។
នាយករដ្ឋមន្ត្រីប្រាយុទ្ធ ចាន់អូចា បញ្ជាក់ថា « រដ្ឋាភិបាលនឹងខិតខំអស់ពីសមត្ថភាពដើម្បីចរចាជាមួយក្រុមបាតុករស្វែងរកដំណោះស្រាយសមស្រប។ ប៉ុន្តែខ្ញុំសូមស្នើដល់បាតុករ មិនត្រូវធ្វើឲ្យខូចខាតទ្រព្យសម្បត្តិសាធារណៈ»។ លោកប្រាយុទ្ធបន្តទៀតថា កិច្ចចរចាជាមួយបាតុករ អាចនឹងធ្វើឡើងនៅថ្ងៃទី២០ខែតុលានេះ។
នាយករដ្ឋមន្ត្រីប្រាយុទ្ធបានលើកឡើងថា«ការដែលរដ្ឋាភិបាលត្រូវការពាររបបរាជានិយមគឺជាកាតព្វកិច្ចរបស់រដ្ឋនិងពលរដ្ឋត្រូវតែធ្វើ»។ លោកបន្តទៀតថា បើបាតុកម្មធ្វើឡើងដោយសន្តិភាពនោះរដ្ឋាភិបាលនឹងមិនប្រើហិង្សាឡើយ ផ្ទុយទៅវិញបើបង្កហិង្សានឹងត្រូវទទួលរងនូវការបំបែកដោយហិង្សាជាមិនខានឡើយ៕
ដោយ៖ធី រីណា
