សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ក្នុងដំណើរទស្សនកិច្ចរវាងជប៉ុន និងឥណ្ឌូណេស៊ី នៅថ្ងៃទី២០ខែតុលាម្សិលមិញនេះ ទីក្រុងតូក្យូ បានសន្យាផ្តល់ប្រាក់កម្ចីជាង៤០០លានដុល្លារផងដែរ ដើម្បីទប់ស្កាត់ និងដោះស្រាយបញ្ហាCOVID-19។ មិនតែប៉ុណ្ណោះ ប្រទេសទាំងពីរ បានយល់ព្រមពន្លឿនកិច្ចចរចាលើកិច្ចព្រមព្រៀងលក់អាវុធ ស្របពេលចិនកំពុងអុងអាត់នៅក្នុងសមុទ្រចិនខាងត្បូង។
ក្នុងជំនួបជាមួយប្រធានាធិបតីឥណ្ឌូណេស៊ី លោក ចូកូ វីដូដូ លោកស៊ូហ្កានាយករដ្ឋមន្រ្តីជប៉ុន បានលើកយកប្រធានបទជាច្រើនមកជជែកក្នុងនោះក៏មានកិច្ចព្រមព្រៀងលក់អាវុធរបស់ជប៉ុន។ អំឡុងទស្សនកិច្ចនៅវៀតណាមលោក ស៊ូហ្កា ក៏ឯកភាពជាមួយសមភាគីវៀតណាមក្នុងការទិញលក់អាវុធដែរ។
លោកនាយករដ្ឋមន្ត្រី ស៊ូហ្កា បានលើកឡើងថា៖«យើងបានឯកភាពជំនួបរដ្ឋមន្ត្រីការបរទេស និងការពារជាតិឲ្យបានលឿន និងពន្លឿនកិច្ចចរចាលើកិច្ចព្រមព្រៀងលក់សម្ភារការពារ និងបច្ចេកវិទ្យា»។ លោក ស៊ូហ្កា បន្ថែមថាជំនួបខាងលើនេះ គឺជាការលើកកម្ពស់កិច្ចសហប្រតិបត្តិទ្វេភាគីលើការការពារជាតិ និងសន្តិសុខ ក្នុងបរិបទនៃការផ្លាស់ប្តូរស្ថានភាពក្នុងតំបន់។
ដោយឡែកលោកប្រធានាធិបតីឥណ្ឌូណេស៊ី វីដូដូ ដែលត្រូវបានស្គាល់ជាទូទៅថា លោក ចូកូវី បានបញ្ជាក់នៅក្នុងសន្និសីទកាសែតរួមគ្នាជាមួយប្រមុខរដ្ឋាភិបាលជប៉ុនថា ភាពជាដៃគូដ៏រឹងមាំរវាងទីក្រុងតូក្យូ និងទីក្រុងហ្សាការតា គឺសំខាន់ណាស់ ក្នុងស្ថានភាពអាមេរិក-ចិន កំពុងមានភាពតានតឹងជាមួយគ្នា។ ដោយការឯកភាពពន្លឿនលើកិច្ចចរចាលក់អាវុធនេះ ធ្វើឡើងក្នុងពេលចិន កំពុងធ្វើសកម្មភាពយ៉ាងខ្លាំងនៅក្នុងសមុទ្រចិនខាងត្បូង និងសមុទ្រចិនខាងកើត។
សូមជម្រាបថា គិតពីឆ្នាំ២០១៤មក ជប៉ុនបានចុះកិច្ចព្រមព្រៀងលក់សម្ភារការពារ និងបច្ចេកវិទ្យាជាមួយហ្វីលីពីន និងថ្មីៗនេះ ជាមួយវៀតណាម។ក្រៅពីកិច្ចចរចាលក់អាវុធ ជប៉ុនក៏បានសន្យាផ្តល់ប្រាក់កម្ចីប្រមាណ ៤៧៣លានដុល្លារ ក្នុងអត្រាការប្រាក់ទាប ដល់ឥណ្ឌូណេស៊ីផងដែរ ដើម្បីដោះស្រាយបញ្ហាសេដ្ឋកិច្ច ដែលបង្កដោយCOVID-19 ។ ជាក់ស្តែងកាលពីខែកុម្ភៈ ទីក្រុងតូក្យូ ក៏ឲ្យទីក្រុងហ្សារកាតាខ្ចីលុយប៉ុន្មានពាន់លានយ៉េនផងដែរ ។
គួរបញ្ជាក់ថា ក្នុងនាមជាបងធំនៅអាស៊ាន ឥណ្ឌូណេស៊ី មិនចង់ពាក់ព័ន្ធនឹងការប្រឈមមុខដាក់គ្នារវាងចិន និងអាមេរិកនៅក្នុងតំបន់ឡើយ។កន្លងមកឥណ្ឌូណេស៊ី បានបណ្ដេញទូកល្បាតចិនចេញពីតំបន់សេដ្ឋកិច្ចផ្តាច់មុខរបស់ខ្លួន ហើយថែមទាំងបដិសេធ មិនឲ្យយន្តហោះស៊ើបការណ៍អាមេរិកចុះចតដើម្បីចាក់សាំងថែមទៀត៕ដោយ៖ស តារា
