សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមសារព័ត៌មាន CNA បានដកស្រង់ចេញផ្សាយនៅព្រឹកថ្ងៃចន្ទ ទី២៦ ខែតុលា ឆ្នាំ២០២០នេះថា៖ ខណៈចំនួនករណីឆ្លងបានបន្តកើនឡើងយ៉ាងគំហុក នៅទូទាំងពិភពលោក ពិសេសនៅទ្វីបអាមេរិក និងអឺរ៉ុបនោះ ប្រធានអង្គការសុខភាពពិភពលោក (WHO) លោកថេដ្រូស អាដាណម (Tedros Adhanom Ghebreyesus) បានអំពាវនាវឲ្យមានការសាមគ្គីភាពជាសកល ក្នុងការដាក់ចេញឲ្យប្រើប្រាស់វ៉ាក់សាំងប្រឆាំងវីរុសកូរ៉ូណា (COVID-19) ណាមួយនាពេលអនាគត។
លោក Tedros បានបញ្ជាក់ថា មានតែមធ្យោបាយមួយគត់ ដើម្បីឲ្យពិភពលោកបានជាសះស្បើយពីជំងឺរាតត្បាតសកល (COVID-19) នេះគឺមានតែការសាមគ្គីគ្នា និងការធ្វើឱ្យប្រាកដថា បណ្តាប្រទេសក្រីក្រនានាអាចមានសិទ្ធិទទួលបាន នូវវ៉ាក់សាំងដូចបណ្ដាប្រទេសអ្នកមានដែរ។
ប្រមុខដឹកនាំអង្គការ WHOរូបនេះ បានគូសបញ្ជាក់យ៉ាងដូច្នេះថា៖ «វាជារឿងធម្មតាទេ ដែលបណ្ដាប្រទេសនានាចង់ការពារពលរដ្ឋរបស់ខ្លួនជាមុនប៉ុន្តែប្រសិនបើយើងមានវ៉ាក់សាំងដែលមានប្រសិទ្ធិភាពហើយ យើងក៏ត្រូវប្រើវាឲ្យមានប្រសិទ្ធភាពផងដែរ… ហើយវិធីដែលល្អបំផុតនោះ គឺការចាក់វ៉ាក់សាំងជូនប្រជាជនមួយចំនួន នៅក្នុងប្រទេសទាំងអស់ជាជាងការចាក់វ៉ាក់សាំង ជូនប្រជាជនទាំងអស់នៅក្នុងប្រទេសតែមួយចំនួន។ ខ្ញុំក៏សូមបញ្ជាក់ម្ដងហើយម្ដងទៀត ឲ្យកាន់តែច្បាស់ដែរថា ការចាក់វ៉ាក់សាំងជាតិនិយម នឹងអូសបន្លាយរយៈពេលឲ្យកាន់តែវែង សម្រាប់ជំងឺឆ្លងរាតត្បាតសកល (COVID-19) នេះ ដោយមិនមែនជាការបន្ថយរយៈពេលឲ្យខ្លីនោះទេ»។
សូមជម្រាបថា អង្គការសុខភាពពិភពលោក (WHO) ក៏បានដាក់ចេញនូវគម្រោងអន្តរជាតិមួយ ដែលមានឈ្មោះថា Covax ដើម្បីធានាឲ្យបានថាគ្រប់ប្រទេសជាសមាជិកទាំងអស់ នឹងទទួលបានវ៉ាក់សាំងប្រឆាំង COVID-19 ដែលប្រកបដោយនូវសុវត្ថិភាព ប្រសិទ្ធភាព និងស្មើភាពគ្នាផងដែរ។ ប៉ុន្តែទោះជាយ៉ាងណា WHO បានសង្កត់ធ្ងន់ថា ខ្លួននៅត្រូវការថវិកាបន្ថែមទៀតដើម្បីដំណើរការគម្រោងនេះបានដោយរលូន និងកាន់តែឆាប់។
គួរបញ្ជាក់ថា បច្ចុប្បន្ននេះ អ្នកវិទ្យាសាស្ត្រនៅជុំវិញពិភពលោកកំពុងតែប្រណាំងគ្នា ដើម្បីអភិវឌ្ឍន៍វ៉ាក់សាំងប្រឆាំង COVID-19 ដែលបានសម្លាប់មនុស្សជាង ១.១លាននាក់រួចទៅហើយនេះ… ហើយបេក្ខភាពវ៉ាក់សាំងជាច្រើន កំពុងស្ថិតក្រោមការធ្វើតេស្ត ក្នុងនោះមានវ៉ាក់សាំងចំនួន ១០ហើយដែលកំពុងស្ថិតក្រោមការធ្វើតេស្តដំណាក់កាលទី ៣ ឬចុងក្រោយដោយមានការចូលរួម ពីសំណាក់ក្រុមអ្នកស្ម័គ្រចិត្តរាប់ម៉ឺននាក់៕ដោយ៖ស តារា
