មេដឹកនាំអ៉ីរ៉ង់៖ ខ្លួនមិនមានការចាប់អារម្មណ៍ ចំពោះបក្សណាឈ្នះ ឬក៏ចាញ់នោះទេ ព្រោះគណបក្សទាំង២សុទ្ធតែមាននយោបាយគគ្លើនដាក់អ៉ីរ៉ង់

អន្តរជាតិ៖ មេដឹកនាំកំពូលអ៉ីរ៉ង់ លោក អាយ៉ាតូលឡាហ៍ អាលី ខាមេនី(Ayatollah Ali Khamenei) ថ្លែងក្នុងសុន្ទរកថាមួយ ចេញផ្សាយតាមកញ្ចក់ទូរទស្សន៍រដ្ឋអ៉ីរ៉ង់ កាលពីថ្ងៃអង្គារ ទី៣ ខែវិច្ឆិកា ឆ្នាំ២០២០ម្សិលមិញនេះថា លទ្ធផលបោះឆ្នោតប្រធានាធិបតីអាមេរិក នឹងមិនធ្វើឱ្យប៉ះពល់ដល់គោលនយោបាយរបស់ទីក្រុងតេហេរ៉ង់ ចំពោះទីក្រុងវ៉ាស៊ីនតោនឡើយ។

បើតាមសារព័ត៌មាន BBC បានចេញផ្សាយនៅព្រឹកថ្ងៃពុធ ទី០៤ ខែវិច្ឆិកាឆ្នាំ២០២០នេះថា  លោក អាយ៉ាតូលឡាហ៍ អាលី ខាមេនី បានលើកឡើងដូច្នេះថា៖ «គោលនយោបាយរបស់យើង… គឺត្រូវបានកំណត់យ៉ាងជាក់លាក់ ហើយវានឹងមិនផ្លាស់ប្ដូរដោយសារតែបុគ្គលណាម្នាក់នោះដែរ។ពោលគឺវាគ្មានបញ្ហាឡើយ សម្រាប់ពួកយើង ទោះបីជានរណាជាប់ឆ្នោតជាប្រធានាធិបតីអាមេរិកក៏ដោយ»។

បើតាមការអះអាងពីកងកម្លាំងបដិវត្តន៍អ៉ីរ៉ង់ (IRGC) ក៏បានប្រកាសថា ខ្លួនមិនមានការចាប់អារម្មណ៍ខ្លាំង ចំពោះនរណាឈ្នះ ឬក៏ចាញ់ នៅក្នុងការបោះឆ្នោតប្រធានាធិបតីនៅអាមេរិកនោះឡើយ ព្រោះគណបក្សអាមេរិកគឺទាំង ២ គឺប្រធានាធិបតី និងសាធារណរដ្ឋ សុទ្ធតែមាននយោបាយគគ្លើនចំពោះប្រទេសអ៉ីរ៉ង់ដូចៗគ្នា។

ដោយឡែក បើតាមអ្នកជំនាញនយោបាយ បានមើលឃើញថា អ៉ីរ៉ង់ហាក់ដូចជាចង់ឱ្យលោក ចូ បៃដិន ជាប់ឆ្នោតជាប្រធានាធិបតីជាជាងលោកដូណាល់ ត្រាំ ដ្បិតទីក្រុងតេហេរ៉ង់សង្ឃឹមថា លោក បៃដិន នឹងអាចស្ដារកិច្ចព្រមព្រៀងនុយក្លេអ៊ែរអ៉ីរ៉ង់ឆ្នាំ២០១៥ ឡើងវិញ ។

គួរបញ្ជាក់ថា ក្រោយលោក ដូណាល់ ត្រាំ ដកសហរដ្ឋអាមេរិកចេញពីកិច្ចព្រមព្រៀងនេះកាលពីឆ្នាំ២០១៨ ប៉ុន្តែទណ្ឌកម្ម និងការគាបសង្កត់មកលើអ៉ីរ៉ង់ គឺទំនងជាមិនមានការផ្លាស់ប្តូរឡើយ គ្រាន់តែស្ថិតនៅក្នុងមធ្យោយបាយផ្សេងគ្នាប៉ុណ្ណោះ៕

ដោយ៖ស តារា