សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ លោក Narongphan Jittkaewtae មេបញ្ជាការកងទ័ពជើងគោកថៃ បន្ទាប់ពីត្រូវបានគេចោទសួរជុំវិញលទ្ធភាពធ្វើរដ្ឋប្រហារទម្លាក់នាយករដ្ឋមន្ត្រីថៃ លោក ប្រាយុទ្ធ ចាន់អូចា កាលពីថ្ងៃទី៩ ខែវិច្ឆិកាថ្មីៗនេះលោក បានច្រានចោលពីការធ្វើរដ្ឋប្រហារទម្លាក់លោកប្រាយុទ្ធ ចាន់អូចានាយករដ្ឋមន្ត្រីថៃ ដើម្បីស្ដារស្ថានការណ៍នយោបាយនៅក្នុងប្រទេស ខណៈដែលកំពុងជួបបញ្ហាជាច្រើន។
បើតាមការចុះផ្សាយរបស់កាសែតបាងកកប៉ុស្តិ៍ បាននិយាយថា មេបញ្ជាការកងទ័ពជើងគោកថៃរូបនេះ បានបញ្ជាក់ថា៖«លទ្ធភាពស្ថិតនៅក្រោមសូន្យ»។ លោក Narongphan បានបន្ថែម ដំណោះស្រាយនៃអស្ថិរភាពនយោបាយបច្ចុប្បន្ន គួរតែត្រូវបានដោះស្រាយដោយមធ្យោបាយនយោបាយជាជាងការធ្វើរដ្ឋប្រហារ។ លោក Narongphan បានបញ្ជាក់ទៀតថាប្រសិនក្រុមបាតុករ និងមនុស្សផ្សេងទៀតផ្តោតលើដំណោះស្រាយ នោះគេនឹងរកឃើញវីធីមួយចំនួន ដែលត្រូវធ្វើហើយ។
សូមជម្រាបថា មកទល់ពេលនេះ បាតុករថៃ នៅតែបន្តទាមទារឲ្យលោក ប្រាយុទ្ធ ចន្ទអូចា នាយករដ្ឋមន្ត្រីថៃចុះចេញពីតំណែង, ទាមទារធ្វើកំណែទម្រង់លើស្ថាប័នព្រះមហាក្សត្រ និងវិសោធនកម្មរដ្ឋធម្មនុញ្ញ។ បើទោះបីជាមានការទាមទារជាច្រើនលើកក៏ដោយ ប៉ុន្តែលោក ប្រយុទ្ធនៅតែបន្តបដិសេធមិនចុះចេញដដែល ដោយសំអាងថា លោកនឹងមិនរត់គេចទៅណាឡើយ។
គួរបញ្ជាក់ថា កន្លងមក ព្រះមហាក្សត្រថៃ មហា វជិរាលង្ករណ៍ ក៏ធ្លាប់បានមានព្រះបន្ទូលឲ្យគ្រប់ភាគីទាំងអស់ ដោះស្រាយបញ្ហាដោយការសម្របសម្រួល និងព្យាយាមស្វែងរកដំណោះស្រាយនៅក្នុងប្រទេស
ដោយឡែកបើតាមអ្នកតាមដានស្ថានការណ៍ថៃ នៅមុនរដ្ឋប្រហារឆ្នាំ២០១៤លោកប្រយុទ្ធ ក៏ធ្លាប់បានសន្យារបែបនេះដែរ ប៉ុន្តែក្រោយមកលោក ក៏បានធ្វើរដ្ឋប្រហារទម្លាក់លោកស្រី យីងឡាក់ ស៊ីណាវ៉ាត់ និងក្លាយជានាយករដ្ឋមន្ត្រី៕ដោយ៖ស តារា
