ព័ត៌មានទាន់ហេតុការណ៍៖

កូរ៉េខាងត្បូង៖ ចារកិច្ចកូរ៉េខាងជើង ​វាយប្រហារក្រុមហ៊ុនវ៉ាក់សាំងកូវីដ​-១៩​

ចែករំលែក៖

ក្រសួងចារកិច្ចកូរ៉េខាងត្បូងបានប្រកាសឲ្យដឹងថា ក្រុម«ហែកឃឺ»កូរ៉េខាងជើង​បានព្យាយាមវាយប្រហារទៅលើក្រុមហ៊ុនផលិតវ៉ាក់សាំងប្រឆាំងកូវីដ​-១៩​របស់កូរ៉េខាងត្បូង​។
លោកHa Tae-keung តំណាងរាស្ត្រកូរ៉េខាងត្បូងមួយរូបបានឲ្យដឹងថា​​ លោកទទួលបានព័ត៌មានពីក្រុមចារកិច្ចជាតិថា កូរ៉េខាងជើងបានវាយប្រហារទៅលើក្រុមហ៊ុនផលិតវ៉ាក់សាំង​ប្រឆាំងកូវីដ​-១៩​។
មកទល់ពេលនេះមិនទាន់មានរបាយការណ៍ស្តីពីការខូចខាតឬបាត់បង់ដោយសារតែការវាយប្រហារពីកូរ៉េខាងជើងនោះឡើយ។
កាលពីសប្តាហ៍កន្លងមក ក្រុមហ៊ុន Microsoft ​បានប្រកាសថា ក្រុម​ហែកឃឺ​របស់រុស្ស៊ី និងកូរ៉េខាងជើង បានព្យាយាមចូលទៅកាន់បណ្តាញ​ របស់ក្រុមហ៊ុនឱសថចំនួន​៧ផ្សេងគ្នា​​ក្នុងនោះមានក្រុមហ៊ុន ស្រាវជ្រាវនិងផលិតវ៉ាក់សំាងរបស់កូរ៉េខាងត្បូង កាណាដា បារាំង​ ឥណ្ឌា និងអាមេរិក​។
ប៉ុន្តែមកទល់ពេលនេះភាគីកូរ៉េខាងជើងមិនទាន់មានប្រតិកម្មអ្វី​ជុំវិញ​ការចោទប្រកាន់ខាងលើនោះឡើយ​។ រដ្ឋាភិបាលទីក្រុងព្យុងយ៉ាងបានរឹតបន្តឹងការទប់ស្កាត់ឆ្លងកូវីដ​-១៩​ក្នុងប្រទេសរបស់ខ្លួន​ ហើយសូម្បីតែជំនួយបរទេសក៏មិនហ៊ានទទួលយកដែរ ខ្លាចឆ្លងកូវីដ-១៩៕ដោយ៖ធី រីណា


ចែករំលែក៖