សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ តាយាយ ២នាក់ប្តីប្រពន្ធ និងចៅៗកំព្រា ៣នាក់ក្នុងបន្ទុក រស់នៅភូមិស្វាយភ្លោះ ឃុំព្រៃក្រសាំង ស្រុកឧដ្តុង្គ ខេត្តកំពង់ស្ពឺ រំភេីបរីករាយឥតឧបមារ ក្រោយពេលទទួលបានផ្ទះថ្មថ្មី ១ខ្នង ដែលជាព្រះរាជអំណោយដ៏ឧត្តុង្គឧត្តមរបស់ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា តាមរយៈ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។
ក្នុងឱកាសនៃពិធីប្រគល់-ទទួលផ្ទះ នារសៀលថ្ងៃព្រហស្បតិ៍ ទី ១៧ ខែធ្នូ ឆ្នាំ២០២០នេះ លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំនូវព្រះរាជបណ្តាំ និងប្រសាសន៍ផ្ដាំផ្ញើសួរសុខទុក្ខ ក្តីនឹករលឹក និងអាណិតស្រឡាញ់ដ៏ជ្រាលជ្រៅពីសំណាក់ សម្ដេចព្រះមហាក្សត្រី ព្រះវររាជមាតាជាតិខ្មែរ និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះគ្រួសារលោកតា សុំ សាន អាយុ ៦៨ឆ្នាំ ពិការដៃម្ខាង-ជេីងម្ខាង និងលោកយាយជាម្តាយ ព្រមទាំងចៅៗកំព្រាទាំង ៣នាក់។ ទន្ទឹមនឹងនេះ លលោកស្រី បានពាំនាំព្រះរាជបណ្តាំ និងប្រសាសន៍ផ្ដាំផ្ញើជូនគ្រួសារលោកតា ក៏ដូចជាប្រជាពលរដ្ឋទាំងអស់ ត្រូវយកចិត្តទុកដាក់គិតគូរថែទាំសុខភាពឱ្យបានល្អ មានអនាម័យស្អាតក្នុងការរស់នៅ និងផឹកទឹកឆ្អិនដាំពុះជានិច្ចដើម្បីជៀសផុតពីជំងឺផ្សេងៗ ជាពិសេសត្រូវអនុវត្តតាមវិធានការនានារបស់ក្រសួងសុខាភិបាល «រស់នៅធម្មតាតាមបែបគន្លងថ្មី» ដេីម្បីជៀសផុតពីជំងឺកូវីដ-១៩ និងសូមថែទាំផ្ទះថ្មីនេះឱ្យបានល្អ ជាទ្រព្យសម្បត្តិតរៀងទៅ។
សូមបញ្ជាក់ថា ផ្ទះខាងលេីខ្នងនេះប្រេីពេលសាងសង់ ២ខែ ចំណាយថវិកា ៥.៥០០ដុល្លារ (ប្រាំពាន់ប្រាំរយដុល្លារអាមេរិក) មានទំហំ ៦ម៉ែត្រ x ៧ម៉ែត្រ ក្រាលការ៉ូ ដំបូលប្រក់ហ្វីប្រូ មានបន្ទប់ទឹកមួយក្នុងផ្ទះ និងរៀបឥដ្ឋចាក់ខឿនជុំវិញផ្ទះមួយម៉ែត្រ។
ដេីម្បីជួយសម្រាលដល់ជីវភាពរស់នៅ កាកបាទក្រហមកម្ពុជា បានផ្តល់ជូនអំណោយសម្រាប់សង្កត់ផ្ទះរួមមាន ៖ អង្ករ ១០០គីឡូក្រាម, មី៥កេស, ត្រីខ ៥០កំប៉ុង, ឃីត (សារុង ក្រមា មុង ភួយ អាវយឺត) ១ឃីត, ស្បែកជើង, សម្លៀកបំពាក់, ភេសជ្ជៈទឹកឃ្មុំ១ឡូ, ទឹកត្រី ១២ដប, ទឹកស៊ីអុីវ ១២ដប, ប្រេងឆា ២ដប, អំបិល ៥គីឡូ, ស្ករស៥គីឡូ, កន្ទេល៣, កាបូប៣, ឈុតគ្រឿងចានឆ្នាំង និងថវិកា ១លានរៀល។ ដោយឡែក លោកយាយចាស់ៗ ដែលរស់នៅជិតខាងចំនួន ៦នាក់ ក្នុងម្នាក់ៗទទួលបាន អង្ករ មី ត្រីខ សារុង ក្រមា មុង ភួយ អាវយឺត និងថវិកាមួយចំនួនផងដែរ៕
ដោយ៖សិលា
