សារព័ត៌មាន នគរវត្ត តែងតែនាំមុខគេជានិច្ច
អភិបាលរដ្ឋ Katsina បានប្រកាសឲ្យដឹងថា សិស្សចំនួន៣៤៤នាក់ត្រូវបានរំដោះចេញពីដៃក្រុមបូកូ ហារ៉ាម។
លោក Aminu Masari អភិបាលរដ្ឋ Katsina បានបញ្ជាក់ថា មានសិស្សទាំងប្រុសទាំងស្រី ដែលក្រុមបូកូ ហារ៉ាមប្រកាសថាពួកគេជាអ្នកចាប់ខ្លួននោះពេលនេះកំពុងតែធ្វើដំណើរឆ្ពោះទៅកាន់Katsina ។
លោកAminu Masari បានបញ្ជាក់ថា នៅពេលនេះ សិស្សទាំង៣៤៤នាក់បានប្រគល់ទៅឲ្យក្រុមសន្តិសុខហើយ។ នៅថ្ងៃទី១៨ខែធ្នូ ក្រុមគ្រូពេទ្យនឹងត្រួតពិនិត្យសុខភាពមុនពេលប្រគល់ឲ្យជួបជុំក្រុមគ្រួសារវិញ។
ក្រុមសិស្សនិងនិស្សិត ដែលបានរំដោះនោះត្រូវបានកម្លាំងក្រុមភេរវកម្ម បូកូ ហារ៉ាមចាប់ខ្លួនកាលពីថ្ងៃទី១១ខែធ្នូ នៅសាលាមធ្យមសិក្សានាតំបន់ជនបទ Kankara ។សាលានោះមានសិស្សសរុប៨០០នាក់ ត្រូវក្រុមខ្មាន់កាំភ្លើងវាយប្រហារចាប់ខ្លួនកាលពីសប្តាហ៍កន្លងមក ប៉ុន្តែក៏មានសិស្សជាច្រើន បានគេចខ្លួនរួចត្រឡប់មកផ្ទះវិញដែរ។
លោកMasari បានឲ្យដឹងទៀតថា «យើងបានបង្កើតបណ្តាញទំនាក់ទំនងផ្ទាល់ជាមួយក្រុមភេរវកម្មដើម្បីឱ្យដោះលែងសិស្សទាំងអស់ដោយមិនមានជួបបញ្ហាអ្វីឡើយ។ អរគុណព្រះជាម្ចាស់ ដែលពួកគេស្តាប់តាម ហើយដោះលែងដោយមិនចាំបាច់ផ្ទុះអាវុធមួយគ្រាប់ណាឡើយ។
ប្រធានាធិបតី នីហ្សេរីយ៉ា លោក Muhammadu Buhari បានអបអរសាទរដល់ការដោះលែងសិស្សទាំងអស់ឲ្យវិលត្រឡប់មកជួបជុំគ្រួសារវិញដោយសុវត្ថិភាព។
ទាំងនោះជាភាពរីករាយយ៉ាងខ្លាំងសម្រាប់គ្រួសារនិងប្រទេសជាតិ ក៏ដូចជាសហគមន៍អន្តរជាតិ ៕ដោយ៖ធី រីណា
រូបភាព៖zing news
