សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ នៅព្រឹកថ្ងៃសុក្រ ទី២៥ ខែធ្នូ ឆ្នាំ២០២០ លោក ប៉ុច សច្ចៈ រដ្ឋលេខាធិការក្រសួងធនធានទឹក និងឧតុនិយម និងលោក ងួន រតនៈ អភិបាល នៃគណៈអភិបាលខេត្តបាត់ដំបង បានអញ្ជើញចុះពិនិត្យមើលវឌ្ឍនៈភាពការសាងសង់ទំនប់សាលាតាអន ដែលស្ថិតក្នុងភូមិសាស្ត្រស្រុកឯកភ្នំ ខេត្តបាត់ដំបង។
ក្នុងក៌មានការអញ្ជើញចូលរួមពី លោកគណៈប្រតិភូក្រសួង លោកអនុប្រធាន តំណាងក្រុមហ៊ុន លោកអភិបាលស្រុក និងអ្នកពាក់ព័ន្ធមួយចំនួនទៀត។
មុនពេលចុះពិនិត្យមើលវឌ្ឍនៈភាពនៃការសាងសង់គណៈប្រតិភូមក៏បានបើកកិច្ចប្រជុំ ដើម្បីស្តាប់នូវរបាយការណ៍នានាដែលបានអនុវត្តបានកន្លងមក រួមទាំងបញ្ហាប្រឈម និងការលំបាកមួយចំនួន ដែលកំពុងបានជួបប្រទះ ដើម្បីរួមគ្នាធ្វើការដោះស្រាយផងដែរ។
ក្រោយពីស្តាប់របាយការណ៍នានារួចមក គណៈប្រតិភូបានអញ្ជើញចុះពិនិត្យជាក់ស្តែងដោយផ្ទាល់ នៅទីតាំងសាងសង់ទំនប់ស្ទាក់ទឹកសាលាតាអន និងប្រឡាយចែកចាយមួយចំនួនក្នុងភូមិសាស្ត្រស្រុកឯកភ្នំ ខេត្តបាត់ដំបង។
សូមជម្រាបជូនផងដែរថា គម្រោងស្ទាក់ទឹកសាលាតាអន អាចស្ទាក់ទឹក និងស្ទាក់ថែរក្សាទឹកទុកនៅលើស្ទឹងសង្កែដែលចាត់ទុកជាដំណាក់កាលទី៣ បន្ទាប់ពីអាងទឹកពហុបំណងសេកសកលេខ១ និងទំនប់កង្ហតលេខ២ មុននឹងធ្លាក់ចូលទៅទន្លេសាប ហើយអាចមានលទ្ធភាពស្រោចស្រពលើផ្ទៃដីស្រូវវស្សាចំនួន ១០.៤០០ហិកតា និងស្រូវប្រាំងចំនួន ៤.៧០០ហិកតា និងជាប្រភពទឹកដើម្បីបម្រីដល់ការផ្គត់ផ្គង់ទឹកស្អាតដល់ទីរួមខេត្តបាត់ដំបង
រួមទាំងការលើកកម្ពស់សោភ័ណភាពដល់ទីរួមខេត្តបាត់ដំបង។
គូសបញ្ជាក់ផងដែរថា គម្រោងមួយនេះគឺជាសមិទ្ធិផលថ្មីមួយទៀតរបស់រាជរដ្ឋាភិបាលកម្ពុជា និងសាធារណរដ្ឋកូរ៉េក្រោមការដឹកនាំប្រកបដោយគតិបណ្ឌិតរបស់សម្តេចតេជោនាយករដ្ឋមន្ត្រី នៃព្រះរាជាណាចក្រកម្ពុជា៕
ដោយ៖សិលា
