សារព័ត៌មាន នគរវត្ត តែងតែនាំមុខគេជានិច្ច
អតីតគ្រូបង្វឹកក្លិប Tottenham លោក Christian Gross ត្រូវបានតែងតាំងជាគ្រូបង្វឹកថ្មីរបស់ក្រុម Schalke សម្រាប់រដូវកាលនេះ ក្រោយពីក្លិបបញ្ចប់កិច្ចសន្យាគូ្របង្វឹកចាស់ ហើយលោកគឺជាគ្រូបង្វឹកទី៤របស់ក្លិបSchalke សម្រាប់រដូវកាលនេះ។ នេះបើយោងតាមការចេញផ្សាយរបស់ BBC Sport កាលពីថ្ងៃទី២៨ ធ្នូ ឆ្នាំ២០២០។
បុរសវ័យ៦៦ឆ្នាំដែលបានចាកចេញពីក្លិបអារ៉ាប៊ីសាអូឌីត Al-Ahli កាលពីខែកុម្ភៈបានមកដឹកនាំក្លិបTottenham កាលពីខែវិច្ឆិកា ឆ្នាំ១៩៩៧ ប៉ុន្តែមានរយៈពេលមិនដល់១០ខែផងក្លិបក៏បញ្ចប់កិច្ចសន្យារបស់គាត់។
បច្ចុប្បន្នក្លិប Schalke ដែលស្ថិតនៅបាតតារាងនៃក្របខ័ណ្ឌ Bundesligaរបស់អាឡឺម៉ង់បន្ទាប់ពី១៣ ប្រកួតកន្លងទៅធ្វើមិនបានល្អដែលដឹកនាំដោយលោក David Wagner, Manuel Baum និងលោក Huub Stevens នៅរដូវកាលនេះ។
លោក Christian Gross បាននិយាយថា “ខ្ញុំចង់មានអារម្មណ៍រីករាយចំពោះកីឡាករគ្រប់ពេល។ ខ្ញុំនឹងផ្តល់អ្វីៗគ្រប់យ៉ាងដើម្បីយើងអាចសំរេចគោលដៅរួមគ្នា”។
អតីតកីឡាករសញ្ជាតិស្វ៊ីសរូបនេះត្រូវបានតែងតាំងនៅកិច្ចសន្យារបស់គាត់រហូតដល់ចប់រដូវកាលនេះ។ រហូតមកដល់ពេលនេះក្រុម Schalkeបានត្រឹមតែ៤ពិន្ទុប៉ុណ្ណោះ ហើយកំពុងដេញតាមក្រុម Arminia ចំនួន៦ពិន្ទុក្នុងចំណាត់ថ្នាក់ទី១៦ដែលជាការប្រកួតជម្រុះ។
គួររំលឹកថា សរុបគ្រូបង្វឹកដែលត្រូវក្លិប Schalke បញ្ចប់មុខតំណែងគឺមានលោក Huub Stevens ដែលត្រូវបានតែងតាំងបន្ទាប់ពីការបណ្តេញលោក Manuel Baum កាលពីដើមខែនេះ។ លោក Baum បានជំនួសខ្លួនគាត់ជំនួសអតីតគ្រូបង្វឹកក្លិប Huddersfield លោក David Wagner ដែលត្រូវបានបណ្តេញចេញកាលពីខែកញ្ញា។ ចំណែកលោក Christian Gross ត្រូវបានជំនួសតំណែងលោក Huub Stevens ដែលត្រូវក្លិបបញ្ចប់មុខតំណែងដែរ។ លោក Christian Gross បានទទួលជោគជ័យក្នុងប្រទេសស្វ៊ីសដែលជាប្រទេសកំណើតរបស់គាត់ដោយឈ្នះពានរង្វាន់លីកកំពូលស្វ៊ីស៦ដងក្នុងកំឡុងពេលគាត់ជាមួយក្លិប Grasshopper Zurichនិងក្លិប Basel ៕
ដោយ៖ភារៈ
