សារព័ត៌មាន នគរវត្ត តែងតែនាំមុខគេជានិច្ច
លោកស្រី Nancy Pelosi ប្រធានរដ្ឋសភាអាមេរិក បន្តទទួលបានការបោះឆ្នោតជ្រើសរើសជាប្រធានរដ្ឋសភា ដោយទទួលបានសំឡេងគាំទ្រដល់ទៅ២១៦ លើសបេក្ខភាពមកពីគណបក្សសាធារណរដ្ឋលោក Kevin McCarthy តែ៧សំឡេងប៉ុណ្ណោះ។ បេក្ខភាពមកពីគណបក្សសាធារណរដ្ឋទទួលបានការគាំទ្រ ២០៩ សំឡេង។
បណ្តាតំណាងរាស្ត្រមកពីគណបក្សប្រជាធិបតេយ្យ កាលពីថ្ងៃទី៣ខែមករាឆ្នាំ២០២១ បានបន្តបោះឆ្នោតគាំទ្រលោកស្រី Nancy Pelosi កាន់តំណែងប្រធានរដ្ឋសភាដដែល។ នេះជាការកាន់តំណែងអាណត្តិទី៤ហើយរបស់លោកស្រី ក្លាយជាប្រវត្តិសាស្ត្រអាមេរិកដែលកាន់តំណែងយូរបំផុត។
ប្រធានរដ្ឋសភាអាមេរិក លោកស្រី Nancy Pelosi បានឲ្យដឹងថា ភារកិច្ចដែលត្រូវធ្វើនាពេលនេះ គឺ ត្រូវយកឈ្នះកូវីដ-១៩ ។ លោកស្រីបន្តទៀតថា ក្នុងចំណោមសមាជិករដ្ឋសភាស្ត្រីដល់ទៅ ១២២នាក់ គឺជាប្រវត្តិសាស្ត្រ មិនធ្លាប់មានរយៈពេល ១០០ឆ្នាំកន្លងមក។
លោកស្រី Nancy Pelosi បានបង្កើតប្រវត្តិសាស្ត្រ ក្លាយជាស្ត្រីដំបូងគេបង្អស់ធ្វើជាប្រធានរដ្ឋសភា ក្នុងឆ្នាំ២០០៧ដល់ឆ្នាំ២០១១ ។ នៅពេលនេះលោកស្រីបានបង្កើតប្រវត្តិសាស្ត្របន្ថែម ដោយបន្តជាប់ឆ្នោតជាប្រធានរដ្ឋសភាក្នុងអាណត្តិទី៤។
ចាប់តាំងពីឆ្នាំ១៩៨៧ នៅពេលបោះឆ្នោតចូលក្នុងរដ្ឋសភា លោកស្រីបានអនុម័តច្បាប់ ហាមប្រាមស្ត្រីរំលូតកូន។ លោកស្រីក៏បានជំរុញឲ្យផ្តល់ជំនួយដល់ក្រុមអ្នកក្រីក្រ ពិការភាព ហើយដំឡើងពន្ធចំពោះក្រុមអ្នកមាន ។ លោកស្រីក៏ជាអ្នកគាំទ្រដល់សិទ្ធិភៀសខ្លួន មករស់នៅអាមេរិកផងដែរ៕ដោយ៖ធី រីណា
