សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ គួរឲ្យសង្វេគខ្លាំងណាស់ ខណៈដែលបុរសជាជាងដែកម្នាក់ជិះម៉ូតូតាមផ្លូវសុខៗក៏ត្រូវរថយន្តមិនស្គាល់ម៉ាកបើកមកបុកពីក្រោយអូសជាច្រើនម៉ែត្របណ្ដាលឲ្យបោកក្បាលស្លាប់ក្នុងថ្លុកឈាម រីឯរថយន្តបង្កបានបើកគេចបាត់ស្រមោល ។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកេីតឡេីងកាលពីវេលាម៉ោង៩និង២០នាទីយប់ ថ្ងៃអង្គារទី៥ ខែមករា ឆ្នាំ២០២១ នៅតាមបណ្ដោយផ្លូវ៦០ម៉ែត្រ ជិតច្រកចូលសាលាខណ្ឌមានជ័យ ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
សពជនរងគ្រោះមានឈ្មោះ ហែន ចាន់ទី ហៅប៉ាជូលី ភេទប្រុស អាយុ៣៣ឆ្នាំ មុខរបរជាងដែក ស្នាក់នៅបន្ទប់ជួល ក្នុងភូមិព្រែកតានូ សង្កាត់ចាក់អង្រែលើ ខណ្ឌមានជ័យ និងមានស្រុកកំណើតនៅភូមិបឹងព័ទ្ធ ឃុំស្តុក ស្រុកគងពិសី ខេត្តកំពង់ស្ពឺ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតគេឃើញបុរសរងគ្រោះជិះម៉ូតូម៉ាកហុងដាឌ្រីម ស៊េរីឆ្នាំ២០១២ ពណ៌ខ្មៅ ពាក់ស្លាកលេខភ្នំពេញ 1BC-7511 ធ្វើដំណើរតាមផ្លូវ៦០ម៉ែត្រ ក្នុងទិសដៅពីត្បូងទៅជើង ខណៈមកដល់ចំណុចកើតហេតុខាងលើស្រាប់តែមានរថយន្តមិនស្គាល់ម៉ាកបើកស្របគ្នាមកពីក្រោយក្នុងល្បឿនយ៉ាងលឿនរួចបុកម៉ូតូជនរងគ្រោះទាំងកំរោលអូសទាំងម៉ូតូនិងជនរងគ្រោះប្រហែល៥០ម៉ែត្រ បណ្ដាលឲ្យស្លាប់ក្នុងថ្លុកឈាម។ ចំណែករថយន្តបង្កបើកគេចបាត់ស្រមោលទៅ។
ក្រោយកើតហេតុ គេឃេីញសាច់ញាតិនិងប្រពន្ធជនរងគ្រោះបានមកដល់ស្រែកទ្រហោយំឱបសពគួរឱ្យខ្លោចផ្សាបំផុត ។ បន្ទាប់មកសមត្ថកិច្ចជំនាញចរាចរណ៍ខណ្ឌមានជ័យបានមកធ្វើកំណត់ហេតុរួចប្រគល់សពឲ្យទៅក្រុមគ្រួសារដឹកយកទៅស្រុកកំណេីតធ្វើបុណ្យតាមប្រពៃណី។ ចំណែកម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌមានជ័យដេីម្បីរង់ចាំស្រាវជ្រាវរករថយន្តបង្កឲ្យចូលខ្លួនមកដោះស្រាយតាមច្បាប់ ៕ ដោយ ៖ ភារ៉ា ដង្កោ
