សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល ៖ យុវជនម្នាក់ជិះម៉ូតូមួយគ្រឿងឌុបគ្នា៣នាក់ពីក្រោយរួចធ្វេីដំណេីរឆ្លងផ្លូវ ស្រាប់តែត្រូវបុរសម្នាក់ជិះម៉ូតូម្នាក់ឯងមកបុកចំពីមុខពេញទំហឹងបណ្ដាលឲ្យរបួសធ្ងន់២នាក់ ស្រាល៣នាក់ បង្កការភ្ញាក់ផ្អេីលនិងកកស្ទះចរាចរណ៍ដល់អ្នកដំណេីរកាលពីវេលាម៉ោង៥និង៣០នាទីល្ងាច ថ្ងៃអាទិត្យ ទី១០ ខែមករា ឆ្នាំ២០២១ នៅតាមបណ្ដោយផ្លូវជាតិលេខ១ ក្បែរផ្សារគគីរ ក្នុងឃុំគគីរ ស្រុកកៀនស្វាយ ខេត្តកណ្ដាល ។
តាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកេីតហេតុបានឲ្យដឹងថា ដំបូងគេឃេីញភាគីខាងម៉ូតូហុងដាឌ្រីម ស៊េរី២០១៨ ពណ៌ខ្មៅ ពាក់ស្លាកលេខ កណ្ដាល 1X-3765 ធ្វេីដំណេីរមានគ្នា៤នាក់ (មានចាស់មានក្មេង) តាមបណ្ដោយផ្លូវជាតិលេខ១ ទិសដៅបញ្ច្រាស់ ខណៈមកដល់ចំណុចកេីតហេតុក៏បត់ឆ្លងទៅផ្លូវម្ខាងទៀត ដេីម្បីស្របទិសចរាចរណ៍ តែបត់បានបន្តិចក៏មានបុរសម្នាក់ជិះម៉ូតូមួយគ្រឿងម៉ាក ហុងដាឌ្រីម ស៊េរី២០១៨ ពណ៌ខ្មៅ ពាក់ស្លាកលេខ កណ្ដាល 1AA-9806 ធ្វេីដំណេីរតាមបណ្ដោយផ្លូវជាតិលេខ១ ទិសដៅពីកេីតមកលិចក្នុងល្បឿនលឿន រួចក៏បុកម៉ូតូដែលជិះមានគ្នា៤នាក់កំពុងឆ្លងផ្លូវចំពីមុខពេញទំហឹង បណ្ដាលឲ្យបុរសម្នាក់ជិះម៉ូតូម្នាក់ឯងដួលរងរបួសធ្ងន់ និងភាគីខាងម៉ូតូមានគ្នា៤នាក់ ដោយម្នាក់របួសធ្ងន់គួរសម្យ ឯមនុស្ស៣នាក់ទៀតរងរបួសស្រាល ។
ក្រោយកើតហេតុ សមត្ថកិច្ចមូលដ្ឋានបានមកដល់និងជួយសម្រួលចរាចរណ៍ដល់អ្នកដំណេីរដេីម្បីកុំឲ្យមានការកកស្ទះ ហេីយធ្វេីការវាស់វែងយកម៉ូតូទាំង២គ្រឿងមកអែបកៀន និងទាក់ទងទៅរថយន្តសង្គ្រោះបន្ទាន់របស់មន្ទីពេទ្យបង្អែកកៀនស្វាយមកដឹកជនរងគ្រោះដែលរបួសធ្ងន់ជាងគេទៅមន្ទីពេទ្យកាល់ម៉ែត រីឯភាគីខាងជនរងគ្រោះមានគ្នា៤នាក់ ត្រូវបានសាច់ញាតិដឹកទៅមន្ទីពេទ្យបង្អែកកៀនស្វាយ ដែលនៅក្បែរកន្លែងកេីតហេតុដេីម្បីព្យាបាលរបួស ។ ដោយឡែកម៉ូតូទាំងពីរគ្រឿង ត្រូវបានសមត្ថកិច្ចមូលដ្ឋានយកទៅរក្សាទុករង់ចាំដោះស្រាយតាមច្បាប់ពេលក្រោយ ៕ ដោយ៖ភារ៉ា ដង្កោ
