សារព័ត៌មាន នគរវត្ត តែងតែនាំមុខគេជានិច្ច
តំបន់ជាច្រើនក្នុងទឹកដីប្រទេសជប៉ុនបានរងផលប៉ះពាល់យ៉ាងខ្លាំងដោយព្យុះព្រិលយ៉ាងក្រាស់គ្របដណ្តប់ស្ទើរទូទាំងប្រទេស។ ព្យុះព្រិលដ៏អាក្រក់នោះបណ្តាលឲ្យមនុស្ស៨នាក់ស្លាប់ និងរាប់រយនាក់ទៀតរងរបួស។
ចរាចរណ៍នានាក្នុងប្រទេសជប៉ុន បានកកស្ទះស្ទើរតែទាំងស្រុង ។ មានរថយន្តដល់ទៅជាង១២០០គ្រឿងត្រូវជាប់គាំងនៅលើផ្លូវល្បឿនលឿន ស្ថិតនៅតំបន់ Hokuriku។ ជាមួយគ្នានេះ ព្យុះព្រិលបានធ្វើឲ្យកាត់ផ្តាច់ប្រព័ន្ធអគ្គិសនី ផ្ទះរាប់ពាន់ខ្នងគ្មានអគ្គិសនីប្រើប្រាស់។
តំបន់ភាគខាងជើង និងភាគកណ្តាលមានព្រិលធ្លាក់យ៉ាងក្រាស់មិនធ្លាប់មានពីមុនមកឡើយ។ កម្រិតព្រិលធ្លាក់លើសពីរាល់ឆ្នាំដល់ទៅ៣ដង ។ ព្រិលធ្លាក់យ៉ាងក្រាស់តាំងពីវេលាម៉ោង១១ថ្ងៃត្រង់ ថ្ងៃទី១០ខែមករា រហូតមកដល់ ពេលនេះ។
ជាមួយគ្នានេះប្រទេសជិតខាងជប៉ុន ដូចជាចិន កូរ៉េខាងត្បូង …រហូតដល់តំបន់អឺរ៉ុបមានអេស្ប៉ាញ អាល្លឺម៉ង់ រុស្ស៊ី និងអាមេរិកក៏មានអាកាសធាតុត្រជាក់មិនធ្លាប់មានពីមុនមកដែរ ហើយព្រិលធ្លាក់យ៉ាងក្រាស់ដូចគ្នា ។ នៅប្រទេសអេស្ប៉ាញមានព្រិលធ្លាក់ យ៉ាងខ្លាំងមិនធ្លាប់មានក្នុងរយៈពេល៥០ឆ្នាំកន្លងមក៕
