សារព័ត៌មាន នគរវត្ត តែងតែនាំមុខគេជានិច្ច
យ៉ាងហោចណាស់ក៏មានមនុស្ស ៥នាក់ស្លាប់ដែរ ក្នុងហេតុការណ៍បាញ់ប្រហារនៅទីក្រុងIndianapolis រដ្ឋ Indiana សហរដ្ឋអាមេរិកនៅព្រឹកថ្ងៃទី ២៤ខែមករា (ពេលវេលាក្នុងតំបន់)។ នេះជាការបាញ់ប្រហារទ្រង់ទ្រាយធំបំផុតមិនធ្លាប់មានក្នុងរយៈពេលជាងមួយទសវត្សរ៍កន្លងមក។
ក្នុងចំណោមជនរងគ្រោះមានស្ត្រីមានផ្ទៃពោះម្នាក់បានស្លាប់ទាំងម្តាយនិងកូន បើទោះបីបានបញ្ជូនទៅកាន់មន្ទីរពេទ្យសង្គ្រោះបន្ទាន់ក្តី។ ជាមួយគ្នានោះក្មេងប្រុសម្នាក់ត្រូវគ្រាប់កាំភ្លើងបានសង្គ្រោះទាន់ពេលវេលារួចផុតពីក្តីស្លាប់។
ស្នងការប៉ូលិសទីក្រុង Indianapolis លោក Randall Taylor បានឲ្យដឹងថា នេះជាការវាយប្រហារបណ្តាលឲ្យមានអ្នកស្លាប់ច្រើនបំផុតមិនធ្លាប់មានក្នុងរយៈពេលជាង១ទសវត្សរ៍កន្លងមក។ លោកបន្តទៀតថា កម្លាំងប៉ូលិសទទួលបានការហៅទូរស័ព្ទនៅវេលាម៉ោង៤ទៀបភ្លឺ លុះពេលទៅដល់កន្លែងក៏ឃើញក្មេងប្រុសរងរបួស ។ ពេលចូលដល់ផ្ទះក៏ឃើញមនុស្ស៥នាក់ស្លាប់នៅខាងក្នុង។
នៅក្នុងសន្និសីទកាសែត មន្ត្រីប៉ូលិសទីក្រុងIndianapolis បានឲ្យដឹងថា នេះមិនមែនជាការបាញ់ប្រហារដោយចៃដន្យនោះឡើយ គឺជាគម្រោងរៀបចំទុកជាមុន។ មកទល់ពេលនេះកម្លាំងប៉ូលិសមិនទាន់រកឃើញជនដៃដល់ដែលបាញ់ប្រហារនៅឡើយទេ។ ពេលនេះដែរក្រុម FBI ក៏បានចូលរួមធ្វើការស្រាវជ្រាវស្វែងរកចាប់ខ្លួនជនដៃដល់ដែរ។
នៅក្នុងព្រិឹត្តិការណ៍មួយផ្សេងទៀតដែលពាក់ព័ន្ធនោះដែរ មន្ត្រីប៉ូលិសម៉ិចស៊ីកូ បានរកឃើញសាកសពមនុស្ស១៩នាក់ដែលរងការបាញ់សម្លាប់និងដុតនៅជាប់ព្រំដែនរដ្ឋតិចសាស់អាមេរិក។
មន្ត្រីរដ្ឋ Tamaulipas ប្រទេសម៉ិចស៊ីកូ បានឲ្យដឹងថា បានរកឃើញសាកសពក្រោយមានពលរដ្ឋ ប្រាប់ថាមានរថយន្តមួយគ្រឿងឆេះ។ នៅកន្លែងកើតហេតុប៉ូលិសបានរកឃើញរថយន្តពីរគ្រឿងបានឆេះ ក្នុងនោះរថយន្តមួយគ្រឿងមានសាកសពមនុស្ស៤នាក់និង១គ្រឿងទៀតមានសាកសព១៥នាក់ ព្រមទាំងកាំភ្លើងមួយដើមផងដែរ៕ដោយ៖ធី រីណា
រូបភាព៖AP
