សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រីម្នាក់ជាអ្នកប្រកបមុខរបរលក់ពោតបានរងរបួសជើងយ៉ាងធ្ងន់ធ្ងរត្រូវបានប្រជាពលរដ្ឋទាក់ទងទៅរថយន្តសាមុយដឹកទៅកាន់មន្ទីរពេទ្យភ្លាមៗ បន្ទាប់ពីត្រូវរុឺម៉កសណ្ដោងមួយគ្រឿងបើកលឿនបញ្រ្ចាសទិសដៅចរាចរណ៍ជ្រុលទៅបុកម៉ូតូជនរងគ្រោះពេញទំហឹង កាលពីវេលាម៉ោង៩ និង២០នាទីយប់ថ្ងៃទី២៥ ខែមករា ឆ្នាំ២០២១ តាមបណ្តោយផ្លូវព្រះមុនីរ៉េត ក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញម៉ូតូមួយគ្រឿងម៉ាកគុបជ្រុង ពណ៌ទឹកប៊ិច ពាក់ស្លាកលេខ តាកែវ 1F-1859 បើកបរដោយស្ត្រីម្នាក់មិនទាន់ស្គាល់អត្តសញ្ញាណមានមុខរបរជាអ្នកលក់ពោត បានធ្វើដំណើរតាមផ្លូវព្រះមុនីរ៉េត ទិសដៅពីលិចទៅកេីត លុះមកដល់ចំណុចកើតហេតុស្រាប់តែមានបុរសម្នាក់សង្ស័យស្រវឹងស្រា បានបើកម៉ូតូសណ្ដោងរុឺម៉កមួយគ្រឿងបើកបញ្ច្រាសទិសចរាចរណ៍ពីកេីតទៅលិចក្នុងល្បឿនលឿនល្មម ហេីយក៏ជ្រុលទៅបុកម៉ូតូស្ត្រីរងគ្រោះពេញទំហឹងបណ្ដាលឲ្យរងរបួសជើងយ៉ាងធ្ងន់ធ្ងរត្រូវបានប្រជាពលរដ្ឋទាក់ទងទៅរថយន្តសាមុយដឹកទៅកាន់មន្ទីរពេទ្យភ្លាមៗ ចំណែកជនបង្កត្រូវបានសមត្ថកិច្ចយកទៅសួរនាំនៅប៉ុស្តិ៍នគរបាលរដ្ឋបាលស្ទឹងមានជ័យ២ផងដែរ ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ ហេីយធ្វើការវាស់វែងយកម៉ូតូជនរងគ្រោះនិងម៉ូតូសណ្ដោងរុឺម៉កជនបង្កទៅរក្សាទុកនៅប៉ុស្តិ៍ស្ទឹងមានជ័យទី២ រង់ចាំដោះស្រាយតាមក្រោយ ៕ ដោយ ៖ ភារ៉ា ដង្កោ
