សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តបែនដឹកដីធុនធំមួយគ្រឿងបានបេីកកៀររថយន្តវីហ្គោ បណ្តាលឱ្យរងការខូចខាតទាំងសងខាង កាលពីវេលាម៉ោង១ និង៤០នាទីរសៀល ថ្ងៃទី៣ ខែកុម្ភៈ ឆ្នាំ២០២១ ស្ថិតនៅតាមបណ្តោយផ្លូវលេខ២៧១ ក្នុងសង្កាត់បឹងទំពុនទី១ ខណ្ឌមានជ័យ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តម៉ាកហ៊ីណូ ប្រភេទបែនដឹកដីធុនធំ១គ្រឿង ពណ៌ខៀវ ពាក់ស្លាកលេខ កំពង់ធំ 3A-1381 បើកចេញពីរង្វង់មូលផ្សារដើមថ្កូវ ខណៈមកដល់ចំណុចកើតហេតុខាងលើ ក៏បានឆ្លងភ្លើងស្តុបផ្សារដើមថ្កូវជិតផុតបត់ទៅឆ្វេងដៃមិនប្រយ័ត្ន ស្រាប់តែកៀរប៉ះរថយន្តម៉ាកតូយ៉ូតាវីហ្គោ១គ្រឿងទៀត ពណ៌ខ្មៅ ពាក់ស្លាកលេខ ភ្នំពេញ 2I-6272 ដែលបើកស្របទិសគ្នា បណ្តាលឱ្យគាបជាប់គ្នារងការខូចខាតបន្តិចបន្តួច ហើយសំណាងល្អដែរដែលក្នុងករណីគ្រោះថ្នាក់ចរាចរណ៍នេះ មិនបណ្តាលឲ្យមាននរណាម្នាក់រងបួស ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ រួចធ្វើការវាស់វែងបាញ់ថ្នាំយករថយន្តទាំងពីរគ្រឿងមកដាក់កៀនខាងសិន ហើយឱ្យភាគីទាំងសងខាងសម្របសម្រួលគ្នា ដោយភាគីខាងម្ចាស់រថយន្តបែនដឹកដីជាអ្នកបង្ក ព្រមសងសំណងទៅខាងម្ចាស់រថយន្តវីហ្គោជាអ្នករងគ្រោះចំនួន៥០ដុល្លារ ដើម្បីបញ្ចប់រឿងនៅនឹងកន្លែងតែម្តង៕
ដោយ ៖ ភារ៉ា ដង្កោ
