សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក សុខ ពេញវុធ អភិបាលនៃគណៈអភិបាលខណ្ឌដូនពេញ នាយប់ថ្ងៃអង្គារ ១២កើត ខែផល្គុន ឆ្នាំជូត ទោស័ក ពស ២៥៦៤ ត្រូវនឹងថ្ងៃទី២៣ ខែកុម្ភៈ ឆ្នាំ២០២១ បានដឹកនាំកម្លាំង គណៈបញ្ជាការឯកភាពខណ្ឌ ចុះឃាត់និងពួនស្ទាក់ចាប់រថយន្តធុនធំល្មើសច្បាប់ចរាចរបើកបរលើផ្លូវហាមឃាត់ សរុបបានជាង៤០គ្រឿង។
ក្នុងប្រតិបត្តិការនេះលោក សុខ ពេញវុធ ដឹកនាំកម្លាំងរដ្ឋបាលខណ្ឌដូនពេញដោយផ្ទាល់ ជាលិទ្ធផលឃាត់ចាប់រថយន្តធុនធំដែលល្មើសច្បាប់ចរាចរ និងបើកបរលើផ្លូវហាមឃាត់ រួមមាន៖ មហាវិថីព្រះមុន្នីវង្ស មហាវិថីព្រះនរោត្តម តីរៈវិថីព្រះស៊ីសុវត្ថិ មហាវិថីព្រះសុរាម្រឹត និង មហាវិថី សម្តេចសុធារស សរុបចំនួន ៤១គ្រឿង យកមករក្សាទុកនៅរដ្ឋបាលខណ្ឌដូនពេញ ដើម្បីធ្វើអប់រំណែនាំ និងអនុវត្តតាមនិតិវិធីច្បាប់។
ដោយឡែកលោក គឹម វុត្ថា ប្រធានប្រជាការពារខណ្ឌដូនពេញបានឲ្យដឹងថា ការហាមឃាត់មិនអនុញ្ញាតឱ្យរថយន្តប្រភេទធំពាក់ស្លាកលេខ 3 Aបើកឆ្លងកាត់នោះ ទី១គឺផ្លូវសព្រះស៊ីសុវត្ថិចាប់ពីសម្ដេចសង្ឃជួនណាតដល់ដើមពោធិ៍បារទន្លេសាបនិងផ្លូវទី២ផ្លូវនរោត្តម គឺចាប់ពីវិមានឯករាជ្យដល់រមណីយដ្ឋានវត្តភ្នំ និងជាពិសេសទៀតផ្លូវមុន្នីវង្ស គឺចាប់ពីស្តុបពេទ្យចិនរហូតដល់រង្វង់មូលកួចកាណុង។
លោកប្រធានប្រជាការពារខណ្ឌ បន្តថា ប្រតិបត្តិការឃាត់រថយន្តខាងលេីនេះ អាជ្ញាធរខណ្ឌដូនពេញ បានអនុវត្តជាយូរមកហើយ គឺតាមគោលការណ៍របស់សាលារាជធានីភ្នំពេញ ដែលបានប្រកាសហាមឃាត់រថយន្តប្រភេទធុនធំបើកឆ្លងកាត់នៅផ្លូវហាមទាំងប៉ុន្មានខ្សែនោះ៕ដោយ៖ស តារា
