សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍ភ្ញាក់ផ្អើលមួយបានកេីតឡេីង បន្ទាប់ពីបុរសម្នាក់ មានអាការៈមិនស្រួលខ្លួនបានជិះម៉ូតូមួយគ្រឿងម៉ាក់ហុងដា ឌ្រីមសេ១២៥ ស៊េរីឆ្នាំ២០២០ ចូលទៅហាងម៉ាស្សាយីហោ”ហេង ហេង168″រយៈពេលជាងមួយម៉ោង ស្រាប់តែចេញមកវិញ ត្រូវចោរលួចកាច់សោ.កម៉ូតូយកទៅបាត់ស្រមោលតែម្តង។
ករណីខាងលេីនេះ បានកេីតឡេីងកាលពីវេលាម៉ោង ៣និង១៥នាទីទៀបភ្លឺ ឈានចូលថ្ងៃទី២ ខែមីនា ឆ្នាំ២០២១ តាមបណ្តោយផ្លូវហានណូយ នៅចំណុចផ្ទះម៉ាស្សាយីហោ “ហេងហេង168″ស្ថិតនៅក្នុងសង្កាត់គោកឃ្លាង ខណ្ឌសែនសុខ។
តាមប្រភពព័ត៌មានពីបុរសរងគ្រោះ បានឲ្យដឹងថា មុនពេលកើតហេតុ រូបគាត់ទើបតែចេញមកពីលេងផ្ទះមិត្តភក្តិនៅឯម្តុំភ្នំពេញថ្មី ហើយក៏បើកម៉ូតូមួយគ្រឿងម៉ាក់ហុងដា ឌ្រីមសេ១២៥ ស៊េរីឆ្នាំ២០២០ ពណ៌ខ្មៅ ពាក់ស្លាកលេខស្វាយរៀង 1Q 8365 គោលបំណងជិះទៅផ្ទះវិញនៅឯចាក់អង្រែក្រោម ។
បុរសរងគ្រោះបន្តថា លុះពេលធ្វើដំណើរមកតាមផ្លូវហានណូយ ស្រាប់តែអស់កម្លាំងពេក ក៏ឆ្លៀតចូលទៅម៉ាស្សា និងកោសខ្យល់នៅផ្ទះម៉ាស្សាយីហោ «ហេងហេង168» នេះរយៈពេលមួយម៉ោងក្នុងតំលៃ៣ដុល្លារ ដោយចតម៉ូតូទុកនៅខាងមុខ រួចក៏ចូលទៅម៉ាស្សាមួយភ្លែត ពេលចេញមកវិញស្រាប់តែអត់ឃើញម៉ូតូនោះទេ ។
ប្រភពដដែល បន្ថែមទៀតថា ភ្លាននោះរូបគេក៏បានសួរអ៊ុំស្រី២នាក់ ដែលនៅខាងមុខ គាត់បានឆ្លេីយថា អត់បានដឹងទេ ដោយសារតែគាត់ងងុយដេកពេក ក៏ដេកលក់មួយភាំងទៅ ទើបបង្កការភ្ញាក់ផ្អើលដល់បងប្អូនប្រជាពលរដ្ឋជិតខាងតែម្តង ។
ក្រោយកើតហេតុ ជនរងគ្រោះបានទៅដាក់ពាក្យបណ្តឹងនៅឯប៉ុស្តិ៍រដ្ឋបាលនគរបាលគោកឃ្លាង ដើម្បីឲ្យសមត្ថកិច្ចជួយស្រាវជ្រាវចាប់ជនសង្ស័យមកផ្តន្ទាទោសតាមច្បាប់៕
ដោយ៖លីហ្សា
