សារព័ត៌មាន នគរវត្ត តែងតែនាំមុខគេជានិច្ច
វីរបុរសបាល់ទាត់លោក Pele បានទទួលវ៉ាក់សាំង COVID-19 កម្រិតដំបូងនៅប្រទេសប្រេស៊ីលកាលពីថ្ងៃពុធ។ នេះបើយោងតាមការចេញផ្សាយរបស់សារព័ត៌មានអេស្ប៉ាញ MARCA ។
អតីតខ្សែប្រយុទ្ធក្រុមជម្រើសជាតិប្រេស៊ីលរូបនេះមានវ័យ៨០ឆ្នាំ ដូច្នេះគាត់ត្រូវបានចាត់ចូលទៅក្នុងក្រុមអាទិភាពសម្រាប់ការចាក់វ៉ាក់សាំងនៅប្រេស៊ីលដែលមានចំនួនច្រើនជាង៨,៤៧លានដូសត្រូវបានគេប្រើប្រាស់រួចហើយ។
លោក Pele បានសរសេរនៅលើបណ្តាញសង្គមថា “ថ្ងៃនេះគឺជាថ្ងៃដែលមិនអាចបំភ្លេចបាន! ខ្ញុំបានទទួលវ៉ាក់សាំង។ ជំងឺរាតត្បាតមិនទាន់ចប់នៅឡើយទេ យើងត្រូវតែរក្សាវិន័យដើម្បីការពារជីវិតរហូតដល់មនុស្សជាច្រើនបានចាក់វ៉ាក់សាំង”។
វីរបុរសបាល់ទាត់របស់ប្រេស៊ីលរូបនេះបន្តថា “សូមបន្តលាងដៃរបស់អ្នកនិងនៅផ្ទះប្រសិនបើអាចធ្វើទៅបាន។ នៅពេលអ្នកចេញទៅក្រៅកុំភ្លេចពាក់ម៉ាស់ និងរក្សាគម្លាតសុវត្ថិភាពសង្គមរបស់អ្នក។
រឿងនេះនឹងកើតឡើងប្រសិនបើយើងគិតគូរពីគ្នា និងជួយគ្នាទៅវិញទៅមក។
គួរបញ្ជាក់ថា ប្រទេសប្រេស៊ីលគឺជាប្រទេសមួយក្នុងចំណោមប្រទេសដែលរងផលប៉ះពាល់ខ្លាំងបំផុតពីការឆ្លងរាតត្បាតជំងឺកូវីដ-១៩ ដោយមានមនុស្សជាង១០,៦លាននាក់បានឆ្លងជំងឺនេះ និងមនុស្សជាង ២៥៦,០០០នាក់បានស្លាប់ ៕
ដោយ៖ ភារៈ
