សហគមន៍អឺរ៉ុបមានទំនុកចិត្តលើវ៉ាក់សាំងប្រឆាំងកូវីដ-១៩ របស់រុស្ស៊ី

ចែករំលែក៖

កាលពីមុន អឺរ៉ុបបានរិះគន់ដល់វ៉ាក់សាំងប្រឆាំងកូវីដ-១៩របស់រុស្ស៊ី តែពេលនេះស្រាប់តែប្រកាសមានទំនុកចិត្តលើវ៉ាក់សាំងរុស្ស៊ីទៅវិញ ខណៈដែលប្រទេសក្នុងសហគមន៍ត្រូវការវ៉ាក់សំាងដើម្បីចាក់ជូនពលរដ្ឋ ។ សហគមន៍អឺរ៉ុប បានជំរុញទិញវ៉ាក់សាំង Sputnik V របស់រុស្ស៊ី។

តាមសារព័ត៌មានរ៉យទ័របានផ្សាយថា សហគមន៍អឺរ៉ុប EU បានព្យាយាមរកវ៉ាក់សាំងឲ្យបានគ្រប់គ្រាន់ដើម្បីចាក់ជូនពលរដ្ឋ៤៥០លាននាក់ក្នុងសហគមន៍ឲ្យបានលឿនបំផុត។ ទាំងនោះហើយធ្វើឲ្យអឺរ៉ុបចាំបាច់ត្រូវតែទិញវ៉ាក់សាំងពីរុស្ស៊ីបន្ថែម។ នៅពេលនេះអឺរ៉ុបកំពុងតែពិភាក្សា ជាមួយភាគីរុស្ស៊ីដើម្បីទិញវ៉ាក់សាំង Sputnik V ។

កន្លងមក ប្រទេស Hungary និងSlovakia បានទិញវ៉ាក់សាំង Sputnik V របស់រុស្ស៊ីមកចាក់ជូនពលរដ្ឋ។ ជាមួយគ្នានេះដែរ សាធារណរដ្ឋឆេក ក៏បានចាប់អារម្មណ៍នឹងវ៉ាក់សាំងរបស់រុស្ស៊ីដែរ។ ដោយឡែកប្រទេសអីុតាលី បានពិភាក្សាគ្នាប្រើប្រាស់រោងចក្រផលិតវ៉ាក់សាំងធំបំផុតរបស់ខ្លួន គឺរោងចក្រ ReiThera ជិតទីក្រុងរ៉ូម ដើម្បីផលិតវ៉ាក់សាំង Sputnik V រស់រុស្ស៊ី។

សហគមន៍អឺរ៉ុប បានរិះគន់ពីការយឺតយ៉ាវនៅក្នុងការចែកចាយវ៉ាក់សាំងនៅក្នុងតំបន់ ខណៈដែលប្រទេសមួយចំនួនបានព្រមានពីការឆ្លងរាលដាលកូវីដ-១៩ ជាលើកទីបី។ ដោយឡែក ប្រទេសអង់គ្លេស ដែលជាប្រទេសចាក់វ៉ាក់សាំងមុនគេ ក្នុងតំបន់ មានគម្រោងកាត់បន្ថយការរិតត្បិតខណៈ បានចាក់វ៉ាក់សាំងជាច្រើនដល់ពលរដ្ឋ ហើយការឆ្លងរាលដាលក៏ថយចុះផងដែរ។
ប្រសិនបើវ៉ាក់សាំង Sputnik V របស់រុស្ស៊ី ចូលក្នុងឃ្លាំងប្រើប្រាស់របស់សហគមន៍អឺរ៉ុប គឺជាជោគជ័យយ៉ាងធំធេង របស់រដ្ឋាភិបាលទីក្រុងមូស្គូ ។ សកម្មភាពពាណិជ្ជកម្មរបស់រុស្ស៊ីនិងសហគមន៍អឺរ៉ុប បានជាប់គាំងជាច្រើនឆ្នាំកន្លងមកហើយ ដោយសារតែការដាក់ទណ្ឌកម្ម របស់អាមេរិក និងអឺរ៉ុបទៅលើប្រទេសរុស្ស៊ី ក្រោយទីក្រុងមូស្គូ ដាក់បញ្ជូលតំបន់គ្រីមៀរបស់អ៊ុយក្រែនស្ថិតក្រោមការគ្រប់គ្រងរបស់ទីក្រុងមូស្គូ៕

ដោយ៖ធីរីណា