សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ សម្ភារគ្រឿងឧបភោគបរិភោគមួយចំនួនរបស់អនុប្រធានក្រុមការងារចុះជួយឃុំអំពិលស្រុករមាសហែកត្រូវបានលោកស៊ូ ម៉ុល អភិបាលស្រុកនាំយកប្រគល់ដល់មណ្ឌលចត្តាឡីស័កកំរិត១ឃុំអំពិល នឹងសួរសុខទុក្ខដល់បងប្អូនប្រជាពលរដ្ឋដែលកំពុងធ្វើចត្តាឡីស័កនៅឃុំអំពិលចំនួន០៣នាក់ផងដែរ។
ការប្រគល់សម្ភារះគ្រឿងឧបភោគបរិភោគបានធ្វើឡើងនៅរសៀលថ្ងៃទី៣០ ខែមីនា ឆ្នាំ២០២១មានការចូលរួមពីអស់លោកក្រុមការងារផងដែរ។
លោកស៊ូ ម៉ុល អភិបាលស្រុករមាសហែកថ្លែងអំណរគុណដល់លោកហុឹមនិមុល អនុប្រធានក្រុមការងារចុះជួយឃុំអំពិលស្រុករមាសហែកដែលបានយកចិត្តទុកដាក់និងបានឧបត្ថមជា សម្ភារះជាច្រើនមានដូចជាអង្ករ៥០០គីឡូក្រាម, ទឹកត្រី២០យូរ,ទឹកសុីអុីវ២០យូរ, ប្រេងឆា២កេសស្មើរ១១ដប, ត្រីខចំនួន២កេសនិងសាប៊ូ protex១កេសដល់មណ្ឌលចត្តាឡីស័កកំរិត១ឃុំអំពិល ផងដែរ។
ជាមួយគ្នានោះ លោកអភិបាលស្រុកក៏បានជួបសំណេះសំណាលដល់បងប្អូនប្រជាពលរដ្ឋដែលកំពុងធ្វើចត្តាឡីស័កនៅឃុំអំពិលនិងសូមអោយបងប្អូន ត្រូវបន្តការយកចិត្ត ទុកដាក់ខ្ពស់នូវអនាម័យជាប្រចាំ ដោយលាងសំអាតដៃឲ្យបានញឹកញាប់ជាមួយសាប៊ូ ឬអាល់កុល ហើយត្រូវ ពាក់ម៉ាស់ ឬក្រមាឲ្យបានជាប់ជានិច្ច និងត្រូវអនុវត្តតាមការណែនាំរបស់ក្រសួងសុខាភិបាល ។
លោកក៏បានអំពាវនាវដល់បងប្អូនដែលកំពុងធ្វើចត្តាឡីស័កនៅឃុំអំពិលនេះត្រូវរស់នៅតាម របៀបធម្មតា តាមបែបគន្លងថ្មី និងវិធានការការពារការឆ្លងជំងឺកូវីដ-១៩ ៣ កុំ ៣ការពារ។
-៣ការពាររួមមាន៖
១.ពាក់ម៉ាស់ការពារពេលធ្វើដំណើរទៅទីប្រជុំជន
២.លាងសម្អាតដៃជាមួយសាប៊ូ ទឹកអាល់កុល ឬជែល ឲ្យបានញឹកញប់
៣.អនុវត្តរក្សាគម្លាតសុវត្ថិភាពយ៉ាងតិច ១,៥០ ម៉ែត្រពីអ្នកដទៃ
-៣កុំមាន៖
១.កុំចូលទៅកន្លែងបិទជិត មិនមានខ្យល់ចេញចូលគ្រប់គ្រាន់
២.កុំទៅកន្លែងមានមនុស្សអ៊ូអរ មានមនុស្សនៅជិតៗគ្នាច្រើន
៣.កុំប៉ះពាល់គ្នា កុំចាប់ដៃគ្នា កុំកៀកស្មាគ្នា កុំឱបគ្នាជាដើម៕
ដោយ៖ យឹមសុថាន
