សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ យុវជនម្នាក់បើករថយន្តស្ទូចមួយគ្រឿងខ្វះការប្រុងប្រយ័ត្នជ្រុលទៅបុកគូទរថយន្តឡង់គ្រីស័រដែលកំពុងឈប់ភ្លើងស្តុប បណ្តាលឲ្យរងការខូចខាត និងបង្កការភ្ញាក់ផ្អេីលដល់អ្នកដំណេីរកាលពីវេលាម៉ោង ១៩ និង ៣០នាទីថ្ងៃទី៣ ខែមេសា ឆ្នាំ២០២១ នៅចំណុចស្តុបថ្នល់បត់ តាមបណ្តាយផ្លូវលេខ២១៧ កែងនឹងផ្លូវព្រៃសក្នុងសង្កាត់ដង្កោ ខណ្ឌដង្កោ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តឡង់គ្រីស័រ ពណ៌ខ្មៅមួយគ្រឿង ពាក់ស្លាកលេខភ្នំពេញ2AP-8388បើកតាមបណ្ដោយផ្លូវ លេខ២១៧ ក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើក៏បានឈប់ភ្លើងស្តុប ខណៈនោះក៏មានរថយន្តស្ទូចមួយគ្រឿង ពណ៌ស ពាក់ស្លាកលេខភ្នំពេញ3F-0757បើកបរដោយយុវជនម្នាក់មកពីក្រោយក្នុងល្បឿនលឿនចាប់ហ្វ្រ័ងមិនទាន់ជ្រុលទៅបុករថយន្តឡង់គ្រីស័រ បណ្តាលឲ្យរងការខូចខាត ។
ក្រោយកើតហេតុ សមត្ថកិច្ចមូលដ្ឋានបានឲ្យភាគីទាំងសងខាងធ្វើការសម្របសម្រួលគ្នាអស់រយៈពេលជិត១ម៉ោងទើបត្រូវគ្នា ដោយខាងរថយន្តស្ទូចបានចេញថ្លៃខូចខាតចំនួន៣០០ដុល្លារទៅឲ្យខាងរថយន្តឡង់គ្រីស័រដើម្បីបញ្ចប់រឿង ៕
ដោយ ៖ ភារ៉ា ដង្កោ
