សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ផលិតករភាបយន្តល្បីល្បាញលោក ម៉ៅ អាយុទ្ធបានទទួលមរណភាពហើយក្នុងវ័យ៧៧ឆ្នាំកាលពី រាត្រីថ្ងៃទី១៥ ខែមេសា ឆ្នាំ ២០២១នេះ ។ ដំណឹងនេះបានបង្កើតឲ្យមានការសោកស្តាយយ៉ាងខ្លាំងពីប្រជាពលរដ្ឋខ្មែរគ្រប់មជ្ឈដ្ឋានព្រោះតែលោកបានសាងស្នាដៃជាច្រើនសម្រាប់ជាតិមាតុតភូមិ រួមទាំងស្នាដៃផលិតកម្មវិធីទូរទស្សន៍ ពិសេសភាពយន្តល្បីៗនៅកម្ពុជា។ បើទោះបីជារូបកាយលោកបានចាកចេញទៅមែន ប៉ុន្តែស្នាដៃ និងទឹកចិត្តអាណិតស្រលាញ់ នឹករលឹករបស់មហាជននៅតែមាន។ ស្នាដៃ៥រឿងដែលធ្វើឲ្យទស្សនិកជនបានស្គាល់និងកោតសរសើរខ្លាំងមានដូចជា៖
ទី១. ភាពយន្តបែបប្រវត្តិសាស្រ្តរឿងហ្លួងព្រះស្តេចកន ដែលត្រូវបានផលិតឆ្នាំ២០១៥និងដាក់បញ្ចាំងឆ្នាំ២០១៧។ ភាពយន្តនេះ ចំណាយពេលស្រាវជ្រាវ និងផលិតដល់ទៅ២ឆ្នាំ និងថវិកា១លានដុល្លារ ដោយទូរទស្សន៍ PNN ដែលចូលរួមសម្តែងដោយលោកទេព រិនដារ៉ូ ស៊ិន សក្កដា រស់ សោភ័ណ ឆុំ វត្តី ហេង ប៊ុនលាភ ឌី សាវ៉េត ទ្រង់ ស៊ីសុវត្ថិ សិរីវុឌ្ឍ ជាដើម៕
ទី២. ភាពយន្តខ្នាតធំរឿង នេសាទក្រពើ របស់ផលិតកម្ម ហង្សមាស ភាពល្បីល្បាញរបស់ភាពយន្តនេះបានផ្ទុះចេញការគាំទ្រខ្លាំង អំឡុងឆ្នាំ២០០៣-២០០៤ ដោយមានការចូលរួមសម្តែងដោយលោកព្រាប សុវត្ថិ ស៊ឹម សូលីកា លោក ស្រី ឌី សាវ៉េត លោកញ៉ែម សុគន្ធ នាយព្រែកជាដើម។ ភាពយន្តនេះដែរទទួលបានពានមាស ជាប់ចំណាត់ថ្នាក់លេខ១ក្នុងមហោស្រពវីដេអូជាតិលើកទី២ ឆ្នាំ២០០៥៕
ទី៣. ភាពយន្តរឿង ឆ្អឹងអណ្តែត៖ ជាភាពយន្តដ៏ល្បីល្បាញដែលបានផលិតនៅអំឡុងឆ្នាំ ១៩៩០-១៩៩១ របស់នាយកដ្ឋានភាពយន្ត ។ «ឆ្អឹងអណ្តែត» សម្តែងដោយតារាល្បីៗ ដូចជាលោក ទេព រិនដារ៉ូ អ៊ុំ កណ្ណារី អម្ពរ ទេវី ជា ណូបូ ជាដើម៕
ទី៤. ចិត្តចងចាំ៖ «ចិត្តចងចាំ» គឺជាខ្សែភាពយន្តរបស់នាយកដ្ឋានភាពយន្ត និងផលិតឡើងនៅអំឡុងឆ្នាំ១៩៨៨-១៩៨៩ ដោយ សម្តែងដោយលោក ខៃ ប្រសិទ្ធ និងអ្នកនាង អ៊ុំ កណ្ណារី។ស្នាដៃនេះទទួលបានការគាំទ្រយ៉ាងខ្លាំង រហូតដល់ថ្នាក់បញ្ចាំងរយៈពេល១ខែពេញលើរោងភាពយន្តនៅភ្នំពេញ៕
ទី៥. ភាពយន្តរឿង “បិទភ្នែកហែកទ្រូង”។ រឿងនេះជាស្នាដៃផលិត ស្នាដៃ នេះស្ថិតនៅក្នុងផលិតកម្ម បូព៌ាភាពយន្តនិងជាស្នាដៃដឹកនាំដំបូងរបស់លោក នៅក្នុងសម័យសាធារណរដ្ឋខ្មែរនាអំឡុង ឆ្នាំ១៩៧៣។ ភាបយន្តនេះសម្តែងដោយលោក គង់ សំអឿន និងអ្នកស្រី គឹម ណូវ៉ា ហើយលោកក៏បានចូលរួមសម្តែងក្នុងភាពយន្តនេះផងដែរ៕
គួរឲ្យសោកស្តាយដែលនៅមានស្នាដៃសំខាន់ចុងក្រោយមួយទៀតដែលផលិតករល្បីឈ្មោះរូបនេះមិនទាន់បានដឹកនាំសម្តែងគឺរឿងកូនប្រុសក្រោមពន្លឺព្រះចន្ទពេញបរមី ជារឿងនិទានបែបប្រវត្តិសាស្រ្ត ដែលនិយាយពីដំណើរជីវិតតស៊ូរបស់ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដោយមានបញ្ចូលនូវព្រឹត្តិការណ៍សំខាន់ៗជាច្រើន ក្នុងការស្វែងរកសន្តិភាពជូនប្រជាពលរដ្ឋ៕
ដោយ៖ វឌ្ឍនា
