សារព័ត៌មាន នគរវត្ត តែងតែនាំមុខគេជានិច្ច
កម្មវិធីស្បៀងអាហារពិភពលោក(WFP) បានប្រកាសថា បានផ្តល់ជំនួយដល់ពលរដ្ឋមីយ៉ាន់ម៉ា២លាននាក់ដែលរងផលប៉ះពាល់ដោយសារតែវិបត្តិនយោបាយនៅក្នុងប្រទេសនេះចាប់តាំងពីការធ្វើរដ្ឋប្រហារនៅថ្ងៃទី ១ខែកុម្ភៈឆ្នាំ២០២១។
សកម្មភាពផ្តល់ជំនួយបានផ្តោតសំខាន់ទៅលើស្រុកក្រីក្រនៅក្នុងប្រទេសមីយ៉ាន់ម៉ា ។ ក្នុងរយៈពេល៦ខែខាងមុខទៀត អង្គការសុខភាពពិភពលោក បានព្យាករថា និឹងមានពលរដ្ឋ យ៉ាងតិច៣,៤លាននាក់ប្រឈមនឹងកង្វះស្បៀងអាហារ គឺខ្ពស់ជាង ឆមាសទីមួយដែលមានតែ ២,៨លាននាក់។
អគ្គនាយកកម្មវិធីស្បៀងអាហារពិភពលោក WFP លោក Stephen Anderson បានបញ្ជាក់ថា «ពីមួយថ្ងៃទៅមួយថ្ងៃនឹងមានពលរដ្ឋក្រីក្រកើនឡើង ដោយសារតែការបាត់បង់ការងារធ្វើ មិនមានប្រាក់ទិញស្បៀងអាហារ។ ដូច្នេះត្រូវតែមានសកម្មភាពជួយឲ្យទាន់ពេលវេលា បញ្ចៀសផលលំបាកទាំងឡាយ ពិសេសគឺកង្វះស្បៀងអាហារ។
តាមរបាយការណ៍របស់អង្គការសុខភាពពិភពលោក គ្រួសារជាច្រើននៅទីក្រុង Yangon និងតំបន់ជាយក្រុងមិនមានអាហារគ្រប់គ្រាន់នោះឡើយ ឬមានអាហារមិនសូវមានជីវជាតិ ក៏ដូចជាជំពាក់បំណុលកាន់តែច្រើនដើម្បីតែចិញ្ចឹមគ្រួសារ។
ជាមួយគ្នានេះដែរ ប្រទេសតំបន់អាស៊ាន នឹងបើកកិច្ចប្រជុំនៅថ្ងៃទី ២៤ខែមេសាខាងមុខដើម្បីស្វែងរកដំណោះស្រាយបញ្ចប់វិវាទនយោបាយនៅក្នុងប្រទេសមីយ៉ាន់ម៉ា។ វិវាទបានសម្លាប់មនុស្សជាង៧០០នាក់ហើយនិងរាប់ពាន់នាក់ត្រូវកម្លាំងទាហានចាប់ខ្លួន៕ដោយ ៖ ធីរីណា
រូបភាព៖AFP
