សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ កម្លាំងអាជ្ញាធរសមត្ថកិច្ចរបស់កម្ពុជា កាលពីពេលថ្មីៗនេះ បានឃាត់ប្រជាពលរដ្ឋថៃ បានយកត្រាក់ទ័រ ១គ្រឿង មកភ្ជួរដី បង្កបង្កើនផល ចូលដីតំបន់សបង្គោលសីមាលេខ៤៣ ក្នុងភូមិសាស្គ្រភូមិព្រៃចាន់ ឃុំអូរបីជាន់ ស្រុកអូរជ្រៅ យកមកណែនាំឲ្យបញ្ឈប់សកម្មភាព។
បេីតាមមេបញ្ជាការនគរបាលវរៈការពារព្រំដែនគោកលេខ៩១១ លោកវរៈសេនីយ៍ឯក សូរ ចាន់រី បានបញ្ជាក់នៅថ្ងៃទី១៦ ខែឧសភា ឆ្នាំ២០២១ម្សិលមិញនេះថា៖ នៅចំណុចបង្គោលសីមាលេខ៤៣ នៅចំណុចព្រំខាងលិចយាមការ (IND25 4966-1526344) ក្នុងវង្វង់ដីស្រែ ២២៦ហិកតា មាន ២ហិកតា ក្នុងតំបន់ស រឺតំបន់មិនទាន់ច្បាស់លាស់ ដែលប្រជាពលរដ្ឋថៃ យកត្រាក់ទ័រ ១គ្រឿង បានចូលភ្ជួរ ហើយកម្លាំងឈរជើង តាមបន្ទាត់ព្រំដែន ចេញល្បាត ឃើញ ក៏បានហាមឃាត់ និងអោយបញ្ឈប់សកម្មភាពជាបន្ទាន់ ព្រោះតំបន់ព្រំដែននោះ មិនទាន់ច្បាស់លាស់។
លោកមេបញ្ជាការរូបនេះ បន្តថា ក្រោយប្រជាពលរដ្ឋថៃ លួចចូលភ្ជួរស្រែ នៅតំបន់ស ដែលត្រូវបានហាមឃាត់ និងបញ្ឈប់សកម្មភាពភ្ជួរហើយ បច្ចុប្បន្នកម្លាំងនគរបាលវរៈការពារព្រំដែនគោក លេខ៩១១ កំពុងបន្តឃ្លាំមើល និងយកចិត្តទុកដាក់ការពារបូរណភាពទឹកដី មិនអោយមានការឈ្លានពាន។
ដោយឡែកជុំវិញបញ្ហានេះដែរ អភិបាលស្រុកអូរជ្រៅ លោក លី សុវណ្ណារិទ្ធ បានបញ្ជាក់ថា ប្រជាពលរដ្ឋថៃ តែងតែឆ្លៀតឱកាស លួចចូលភ្ជួរលើតំបន់មិនទាន់ច្បាស់លាស់ រឺជាតំបន់ស ហើយជាការកោតសសើរចំពោះកងកម្លាំង ដែលកំពុងឈរជើងការពារបូរណភាពទឹកដី ដែលបានហាមឃាត់ទាន់ពេល នៅពេលប្រជាពលរដ្ឋថៃ លួចចូលភ្ជួរដីស្រែ ក្នុងតំបន់ស។
បន្ថែមពីនេះ លោក លី សុវណ្ណារិទ្ធ ក៏បានណែនាំដល់កងកម្លាំង និងអាជ្ញាធរសមត្ថកិច្ច ត្រូវបង្កើនការយកចិត្តទុកដាក់ ការពារឲ្យបាននូវបូរណភាពទឹកដីរបស់យើងផងដែរ៕ដោយ៖សហការី
