មន្ត្រីអាវុធហត្ថដែលចាក់អតីតប្រពន្ធ ទោះជាលាក់ខ្លួនក៏មិនអាចគេចបានយូរដែរ ខណ:អាវុធហត្ថខេត្តកំពង់ធំ ប្រកាសផ្ដល់រង្វាន់ជូនអ្នករាយការណ៍ពីទីតាំងលាក់ខ្លួនរបស់មន្ដ្រីអាវុធហត្ថម្នាក់នេះ !

ខេត្តកំពង់ធំ៖ អាវុធហត្ថខេត្តកំពង់ធំ ប្រកាសផ្ដល់រង្វាន់ជូនអ្នករាយការណ៍ពីទីតាំងលាក់ខ្លួនរបស់មន្ដ្រីអាវុធហត្ថម្នាក់ ដែលចាក់អតីតប្រពន្ធបណ្ដាលឲ្យរបួសធ្ងន់ និងរក្សាការសម្ងាត់ជូន ដើម្បីឈានដល់ការឃាត់ខ្លួនយកមកផ្តន្ទាទោសក្នុងបទល្មើសព្រហ្មទណ្ឌ។

តាមរយៈ Facebook នៅថ្ងៃទី២៥ ខែឧសភា ឆ្នាំ២០២១ និងបន្តចែកចាយដល់ថ្ងៃនេះ គឺខាង បញ្ជាការដ្ឋានកងរាជអាវុធហត្ថខេត្តកំពង់ធំ ក៏បានបង្ហាញរូបថតរបស់ជនសង្ស័យ និងឈ្មោះរបស់ជនសង្ស័យផងដែរ ដើម្បីងាយស្រួលដល់ប្រជាពលរដ្ឋផ្ដល់ព័ត៌មាន ហើយសមត្ថកិច្ចនឹងរក្សាការសម្ងាត់ជូន។ក្នុងផេកបានបញ្ជាក់ថា, ក្នុងករណីប្រជាពលរដ្ឋប្រទះឃើញជនសង្ស័យ ឈ្មោះ ស្រ៊ន ពេជ្ររស្មី សូមរាយការណ៍ជូនសមត្ថកិច្ចដែលនៅក្បែរជាបន្ទាន់ ឬរាយការណ៍ទៅលេខទូរស័ព្ទរបស់បញ្ជាការដ្ឋានកងរាជអាវុធហត្ថខេត្តកំពង់ធំ តាមរយៈលេខ 097 777 7776, 097 545 5555, 096 616 6666, 017 777 998, 068 762 222, 012 771 909។
សូមរំ់ឮកថា , មន្ត្រីកងរាជអាវុធហត្ថម្នាក់នៅស្រុកសណ្តាន់ បានយកកាំបិតចាក់អតីតភរិយាជាច្រើនកាំបិត បណ្តាលឲ្យរងរបួសធ្ងន់ ហើយស្រ្តីរងគ្រោះត្រូវបានសាច់ញាតិបញ្ជូនមកព្យាបាលនៅមន្ទីរពេទ្យឯកជន។ ករណីអំពើហិង្សានេះបានកើតឡើង នៅភូមិត្បូងទឹក ឃុំមានរិទ្ធ ស្រុកសណ្តាន់ ខេត្តកំពង់ធំ នាថ្ងៃទី២៣ ខែឧសភា ឆ្នាំ២០២១។
នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានយកចិត្តទុកដាក់ជម្រុញអោយកងកម្លាំងដែលជាអ្នកអនុវត្តច្បាប់ ប្រើជំនាញគ្រប់បែបយ៉ាង ដើម្បីឈានដល់ការចាប់ឃាត់ខ្លួនជនសង្ស័យ ជានាយអាវុធហត្ថរូបនេះ អោយខានតែបាន៕

ដោយ៖ សិលា