សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៌មានពីស្នងការដ្ឋាននគរបាលរាជធានីភ្នំពេញ នៅរសៀលថ្ងៃសុក្រទី០៤ ខែកុម្ភៈ ឆ្នាំ២០២២នេះ បានឱ្យដឹងថា ជនសង្ស័យចំនួន០២នាក់ ពាក់ព័ន្ធករណីជួញដូរដោយខុសច្បាប់ នូវសារធាតុញៀន ត្រូវបានកម្លាំងប៉ុស្តិ៍នគរបាលរដ្ឋបាលត្រពាំងក្រសាំង ឃាត់ខ្លួន។
ជនសង្ស័យដែលសមត្ថកិច្ចឃាត់ខ្លួនទី១- ឈ្មោះ មុត សុខសាន ភេទប្រុស អាយុ ២៦ឆ្នាំ មុខរបរជាងសំណង់, និងទី២- ឈ្មោះ លី បញ្ញា ភេទប្រុស អាយុ១៩ឆ្នាំ មុខរបរកម្មករសំណង់ អ្នកទាំងពីរទីកន្លែងស្នាក់នៅមិនពិតប្រាកដ។
យោងតាមរបាយការណ៍របស់សមត្ថកិច្ច បានបន្តថា កម្លាំងប៉ុស្តិ៍នគរបាលរដ្ឋបាលត្រពាំងក្រសាំង នៅថ្ងៃទី០៣ ខែកុម្ភៈ ឆ្នាំ២០២២ឃាត់ខ្លួនជនសង្ស័យចំនួន ០២នាក់ ពាក់ព័ន្ធករណីជួញដូរដោយខុសច្បាប់ នូវសារធាតុញៀន នៅចំណុចភូមិត្រពាំងអញ្ចាញ៥ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
បច្ចុប្បន្នជនសង្ស័យ និងវត្ថុតាង កំពុងឃាត់ខ្លួននៅអធិការដ្ឋាននគរបាលខណ្ឌពោធិ៍សែនជ័យ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធី៕
ដោយ៖សហការី
