សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបេីករថយន្តក្នុងល្បឿនលឿន និងមិនប្រយ័ត្ននៅចំណុចផ្លូវបំបែកបានជ្រុលទៅបុកយុវតីជាសិស្សសាលាប៊ែលធី២នាក់កំពុងជិះម៉ូតូឌុបគ្នាឆ្លងផ្លូវពេញទំហឹង បណ្ដាលឲ្យរងរបួសធ្ងន់ កាលពីវេលាម៉ោង២និង ១៥នាទីរសៀលថ្ងៃទី១៦ ខែកុម្ភៈឆ្នាំ២០២២ នៅតាមផ្លូវបេតុងលេខ១៩ នៅភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនពេលកើកហេតុឃើញយុវតីជាសិស្សសាលា២នាក់បានជិះម៉ូតូម៉ាកស្គូពី ពណ៌ស ពាក់ស្លាកលេខភ្នំពេញ 1IC -4424 ឌុបគ្នាតាមផ្លូវបេតុង ទិសដៅពីជេីងទៅត្បូងមកផ្លូវបំបែកជាបួន ខណៈកំពុងឆ្លងផ្លូវបត់ឆ្វេង ស្របពេលនោះក៏មានបុរសម្នាក់បើករថយន្តកូរ៉េដឹកទំនិញ ១គ្រឿង បេីកបរតាមផ្លូវបេតុងលេខ១៩ទិសដៅពីលិចទៅកើតហេីយជ្រុលមកបុកម៉ូតូយុវតីសិស្សសាលារងគ្រោះពេញទំហឹង បណ្ដាលឱ្យដួលបោកក្បាលនឹងថ្នល់រងរបួសធ្ងន់ទាំង២នាក់ ភ្លាមនោះៗអ្នកបើកបររថយន្តត្រូវបានប្រជាពលរដ្ឋនិងសន្តិសុខក្នុងបុរីឃាត់ខ្លួនប្រគល់ឱ្យសមត្ថកិច្ច ។
ចំណែកយុវតីរងគ្រោះទាំងពីរនាក់ត្រូវបានរថយន្តសង្គ្រោះរបស់គ្លីនិចឯកជនដឹកទៅសង្គ្រោះផងដែរ ។
ក្រោយពេលកើតហេតុ សមត្ថកិច្ចប៉ុស្តិ៍នគរបាលរដ្ឋបាលព្រៃស បានចុះមកដល់ទីតាំងនៅកន្លែងកើតហេតុ និងបានសហការជាមួយនឹងសមត្ថកិច្ចជំនាញចរាចរណ៍ខណ្ឌដង្កោ ធ្វើការវាស់វែងយកម៉ូតូនិងរថយន្ត យកទៅរក្សាទុកនៅអធិការដ្ឋាននគរបាលខណ្ឌដង្កោរង់ចាំធ្វើការដោះស្រាយគ្នានៅពេលក្រោយ ៕
ដោយ ៖ ភារ៉ា ដង្កោ
