សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ អ្នកឃើញហេតុការណ៍បានឱ្យដឹងថា រថយន្តទំនើបបានបើកបុករុឺម៉កដឹកធ្យូងពេញទំហឹងនិងអូសជាច្រើនម៉ែត្រ។ ហេតុការណ៍នេះបានកើតឡើងនៅវេលាម៉ោង ៥៖៤០នាទីព្រឹកថ្ងៃទី១៧ ខែកុម្ភៈ នៅចំណុចកែងការាសសាំងតេលា និងហាងហ្រ្វេន ក្នុងភូមិទី៨ សង្កាត់-ក្រុងកំពង់ចាម។
អ្នកបើកបររថយន្តឈ្មោះ យុទ្ធ សុវណ្ណរតនៈ ភេទប្រុស រស់នៅភូមិទី៦ សង្កាត់វាលវង់ ក្រុង-ខេត្តកំពង់ចាម ។
ចំណែកជនរងគ្រោះទី១-ឈ្មោះ មាត់ ញ៉ ភេទប្រុស អាយុ៤៥ឆ្នាំ រស់នៅភូមិត្រពាំងឈូក ឃុំបឹង ស្រុកបារាយណ៍ ខេត្តកំពង់ធំ រងរបួសជើងធ្ងន់ ។ ទី២-ឈ្មោះ សា កៅ ភេទប្រុស អាយុ៣៥ឆ្នាំ រស់នៅភូមិរកាក្រោម សង្កាត់សំបួរមាស ក្រុងកំពង់ចាម របួសស្រាល ។
ករណីនេះត្រូវបាននគរបាលជំនាញក្រុងកំពង់ចាមស្ទូចយកវត្ថុតាងទៅរក្សាទុករង់ចាំបន្តនីតិវិធី៕
ដោយ ៖ វណ្ណៈ
