អត្តពលិករុស្ស៊ី និងបេឡារូសត្រូវបានដាក់កម្រិតឲ្យប្រកួតជាអព្យាក្រឹតក្នុងព្រឹត្តិការណ៍កីឡាប៉ារ៉ាឡាំពិកឆ្នាំ២០២២ បន្ទាប់ពីការលុកលុយលើអ៊ុយក្រែន

អត្តពលិកមកពីប្រទេសរុស្ស៊ី និងបេឡារូសនឹងត្រូវបានអនុញ្ញាតឱ្យប្រកួតប្រជែងជាអព្យាក្រឹតនៅឯព្រឹត្តិការណ៍កីឡាប៉ារ៉ាឡាំពិករដូវរងាឆ្នាំ២០២២ នៅទីក្រុងប៉េកាំង បន្ទាប់ពីការលុកលុយរបស់រុស្សុីទៅលើអ៊ុយក្រែន។

គណៈកម្មាធិការប៉ារ៉ាឡាំពិកអន្តរជាតិ (IPC) បានប្រកាសថា ប្រទេសទាំង២នឹងប្រកួតប្រជែងក្រោមទង់ជាតិប៉ារ៉ាឡាំពិក ហើយមិនត្រូវបានបញ្ចូលក្នុងតារាងមេដាយទេ។ ពិធីបើកកីឡាមួយនេះគឺធ្វើឡើងនៅថ្ងៃសុក្រ ដោយការប្រកួតចាប់ផ្តើមនៅថ្ងៃសៅរ៍។

ប្រធាន IPC លោក Andrew Parsons បាននិយាយថា វិធានការនេះគឺជាការដាក់ទណ្ឌកម្មដ៏ធ្ងន់ធ្ងរបំផុតនៅក្រោមរដ្ឋធម្មនុញ្ញរបស់ខ្លួន។ IPC និងចលនាប៉ារ៉ាឡាំពិកកាន់តែមានការព្រួយបារម្ភយ៉ាងខ្លាំងចំពោះការរំលោភលើកិច្ចព្រមព្រៀងអូឡាំពិកដោយរដ្ឋាភិបាលរុស្ស៊ី និងបេឡារុស្ស នៅប៉ុន្មានថ្ងៃមុនការប្រកួតកីឡាប៉ារ៉ាឡាំពិករដូវរងានៅទីក្រុងប៉េកាំងឆ្នាំ២០២២។

លោកបន្តថា “ក្រុមប្រឹក្សាភិបាល IPC រួបរួមគ្នាក្នុងការថ្កោលទោសចំពោះសកម្មភាពទាំងនេះ ហើយបានយល់ព្រមថា ពួកគេមិនអាចទៅដោយគ្មាននរណាកត់សម្គាល់ ឬមិនអាចដោះស្រាយបាន។ ក្នុងការសម្រេចចិត្តថា តើ IPC គួរតែចាត់វិធានការបែបណា? វាជាមូលដ្ឋានគ្រឹះដែលយើងធ្វើការក្នុងក្របខ័ណ្ឌនៃរដ្ឋធម្មនុញ្ញថ្មីរបស់យើង ដើម្បីរក្សាអព្យាក្រឹតនយោបាយ”។

លោក Andrew Parsons បញ្ជាក់ថា “អព្យាក្រឹតភាពបែបនេះត្រូវបានកំណត់យ៉ាងតឹងរ៉ឹងដើម្បីប្រាកដថា កីឡាមានអំណាចផ្លាស់ប្តូរដើម្បីយកឈ្នះលើការខ្វះខាតរបស់យើង ហើយបង្ហាញនូវភាពល្អបំផុតរបស់មនុស្សជាតិ ជាពិសេសនៅក្នុងគ្រាដ៏ងងឹតបំផុតនាពេលនេះ”។

គណៈកម្មាធិការប៉ារ៉ាឡាំពិកសហរដ្ឋអាមេរិក និងសមាគមប៉ារ៉ាឡាំពិកអង់គ្លេសបានសម្តែងការខកចិត្តចំពោះការសម្រេចចិត្តរបស់ IPC ។ សមាគមប៉ារ៉ាឡាំពិកអង់គ្លេសបានឲ្យដឹងថា “យើងដូចជាប្រទេសប៉ារ៉ាឡាំពិកជាច្រើនដែលចូលរួមដែរ បាននិយាយរួចហើយថា ដោយសារទំហំនៃវិបត្តិមនុស្សធម៌នៅអ៊ុយក្រែន យើងមិនអាចមើលពីរបៀបដែលការចូលរួមរបស់រុស្ស៊ី ឬបេឡារុស្សនៅក្នុងកីឡានេះទេ គឺមិនត្រូវគ្នានឹងគោលបំណងនៃចលនាប៉ារ៉ាឡាំពិកនោះទេ” ។

សូមបញ្ជាក់ថា អ្នកប្រកួតប្រជែងចំនួន៧១នាក់មកពីប្រទេសរុស្ស៊ី និង១២នាក់មកពីប្រទេសបេឡារុស្ស បូករួមទាំងមគ្គុទ្ទេសក៍សម្រាប់ប្រទេសទាំងពីរឥឡូវនេះនឹងត្រូវបានចាត់ថ្នាក់ជាអត្តពលិកអព្យាក្រឹតនៅក្នុងព្រឹត្តិការណ៍កីឡាប៉ារ៉ាឡាំពិកឆ្នាំនេះ ៕

ដោយ៖ ភារៈ(រូបភាព ​៖ BBC Sport)