សារព័ត៌មាន នគរវត្ត តែងតែនាំមុខគេជានិច្ច
ខ្សែប្រយុទ្ធ Karim Benzema បានស៊ុតបាល់បញ្ចូលទីយ៉ាងអស្ចារ្យក្នុងតង់ទី២ចំនួន៣គ្រាប់ម្នាក់ឯង ជួយឲ្យក្រុម Real Madrid បានបង្កើតការវាយបកដ៏គួរឱ្យភ្ញាក់ផ្អើលនៅឯទឹកដី Bernabeu ដើម្បីឈានទៅប្រកួតវគ្គ៨ក្រុមចុងក្រោយ ឬវគ្គ 1/4 ផ្តាច់ព្រ័ត្រនៃក្របខ័ណ្ឌ Champions League លើក្រុមខ្លាំងមកពីបារាំង Paris St-Germain នៅជើងទី២ ក្នុងលទ្ធផល៣ទល់១ សរុបទាំង២ជើងគឺ៣ទល់២។
គ្រាប់បាល់ស៊ុតបញ្ចូលទីក្នុងតង់ទី១របស់ Kylian Mbappe បានផ្តល់ឱ្យ PSG នូវគ្រាប់បាល់នាំមុខសរុបទាំង២ជើងចំនួន២គ្រាប់ ហើយមើលទៅបានធ្វើឱ្យក្រុមរបស់លោក Mauricio Pochettino ទទួលបានលទ្ធផលល្អសម្រាប់វគ្គ៨ក្រុមចុងក្រោយ។
ទោះជាយ៉ាងណាក៏ដោយកំហុសរបស់អ្នកចាំទី GianluigiDonnarumma របស់ក្រុម PSG បានបង្ហាញនូវកត្តាជំរុញឱ្យមានការវាយបកឡើងវិញជាមួយនឹងខ្សែប្រយុទ្ធ Benzema បន្ទាប់ពីអ្នកចាំទីសញ្ជាតិអុីតាលីរូបនេះបានចូលចាំទី និងបានស៊ុតបាល់បញ្ចូលទីនៅនាទីទី៦១។
គ្រាប់បាល់ទី២គឺជាការបង្កើតឱកាសរបស់ Luka Modric បានធ្វើឱ្យ Benzema រកបាន១គ្រាប់ទៀតនៅនាទីទី៧៦ ខណៈដែលគាត់បានតាមស្មើទល់នឹងក្រុម PSG ដែលកំពុងព្យាយាមទប់ក្នុងជើងទី២នេះ។ នៅទីបំផុតគ្រាប់ទី៣របស់ Benzema បានកើតឡើងនៅនាទីទី៧៨ដែលស៊ុតផុតដៃអ្នកចាំទី Donnarumma របស់ក្រុម PSG ធ្វើឲ្យលទ្ធផលនៃការប្រកួតជើងទី២ក្រុម Real Madrid វាយបកយកឈ្នះវិញក្នុងលទ្ធផល៣ទល់១។
ជ័យជម្នះនេះបានធ្វើឲ្យក្រុមម្ចាស់ជើងឯក១៣សម័យកាល Real Madrid បន្តឡើងទៅកាន់វគ្គ៨ក្រុមចុងក្រោយនៃក្របខ័ណ្ឌ Champions League រដូវកាលនេះ។ នៅអាយុ៣៤ឆ្នាំនិង៨០ថ្ងៃ Benzema បានក្លាយជាកីឡាករចំណាស់ជាងគេបំផុតដែលស៊ុតបញ្ចូលទីបាន Hat-trick ក្នុងក្របខ័ណ្ឌ Champions League ខណៈដែល៣គ្រាប់របស់គាត់ក៏បានធ្វើឱ្យគាត់ឡើងដល់៣០៩គ្រាប់សរុបសម្រាប់ក្លិប Real Madrid ដោយបានឈរលើកីឡាករជើងចាស់ Alfredo di Stefano ក្នុងបញ្ជីឈ្មោះអ្នកស៊ុតបញ្ចូលទីច្រើនជាងគេគ្រប់ពេលសម្រាប់ក្លិបយក្សអេស្ប៉ាញមួយនេះ។
ជាមួយគ្នានេះក្រុមខ្លាំងមកពីអង់គ្លេស Manchester City បានប្រកួតត្រឹមស្មើ០ទល់០ជាមួយក្រុម Sporting ក្នុងជើងទី២នេះ។ បើទោះបីជាលទ្ធផលស្មើគ្នាក៏ដោយ ក្រុមមេឃខៀវ Man City មានឱកាសគ្រប់គ្រាន់រួចទៅហើយក្នុងការយកឈ្នះកាលពីប្រកួតជើងទី១ ក្នុងលទ្ធផល៥ទល់០។
ក្រុម Real Madrid និងក្រុម Manchester City គឺជាក្រុម២ទៀតដែលបានឡើងទៅកាន់វគ្គ៨ក្រុមចុងក្រោយក្របខ័ណ្ឌ Champions League បន្ទាប់ពីក្រុមខ្លាំងមកពីអាល្លឺម៉ង់ Bayern Munich និងក្រុមខ្លាំងមកពីអង់គ្លេសហង្សក្រហម Liverpool ៕
ដោយ៖ ភារៈ(រូបភាព ៖ BBC Sport)
