សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ កម្លាំងកងរាជអាវុធហត្ថខេត្តបន្ទាយមានជ័យ នៅរសៀលថ្ងៃអង្ការ ទី១៥ ខែមីនា ឆ្នាំ២០២២នេះបានរៀបចំសំណុំរឿងបញ្ជូនជនសង្ស័យចំនួន០២នាក់ពាក់ព័ន្ធករណីជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀនទៅសាលាដំបូងខេត្តបន្ទាយមានជ័យ ចាត់ការតាមនីតិវិធី ។
លោកអនុសេនីយ៍ឯក ចាន់ រដ្ឋា មេបញ្ជាការមូលដ្ឋានកងរាជអាវុធហត្ថស្រុកមង្គលបូរីបានឲ្យដឹងថា៖ ដោយកំណត់មុខសញ្ញាបាន ទើបនៅវេលាម៉ោង១១និង៣០នាទីយប់ ថ្ងៃទី១៣ ខែមីនា ឆ្នាំ២០២២ លោកបានដឹកនាំកម្លាំងចុះធ្វើប្រតិបត្តិការបង្ក្រាបករណីជួញដូរគ្រឿងញៀននិងឃាត់ខ្លួនជនសង្ស័យបានចំនួន០២នាក់ ព្រមទាំងដកហូតវត្ថុតាង ម៉្សៅក្រាមពណ៌សថ្លាចំនួន២៩កូនថង់កិប ស្មើនឹងទម្ងន់១៧,០៩ក្រាម ម៉ូតូ០១គ្រឿង ម៉ាកហុងដាMSX កែច្នៃ និងសម្ភារមួយចំនួនទៀត ហើយបញ្ជូនមកបញ្ជាការមូលដ្ឋានកងរាជអាវុធហត្ថស្រុកដើម្បីសួរនាំ ។ ជនសង្ស័យទាំង០២នាក់ ១/-ឈ្មោះ ជិន ជាតិ ភេទប្រុស អាយុ៤០ឆ្នាំ រស់នៅភូមិប្រឡាយហ្លួងក្រោម ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ ២/-ឈ្មោះ វ៉ាន់ ចន្ធី ហៅវី ភេទប្រុស អាយុ៣៩ឆ្នាំ រស់នៅភូមិឬស្សីក្រោក ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ ។
លោកបញ្ជាក់ទៀតថា៖នៅចំពោះសមត្ថកិច្ចជនសង្ស័យឈ្មោះជិន ជាតិ បានឆ្លើយសារភាពថា ខ្លួនគេពិតជាបានទិញគ្រឿងញៀនពីឈ្មោះ វ៉ាន់ ចន្ធី ហៅវី មករក្សាទុកសម្រាប់ប្រើប្រាស់ពិតប្រាកដមែន ចំណែកឈ្មោះ វ៉ាន់ ចន្ធី ហៅវី បានឆ្លើយសារភាពថា ខ្លួនពិតជាបានទិញគ្រឿងញៀនមកលក់បន្តពិតប្រាកដមែន ។
លោកវរសេនីយ៍ឯក ជា តារា មេបញ្ជាការរងកងរាជអាវុធហត្ថខេត្ត ទទួលការងារប្រឆាំងគ្រឿងញៀនបានប្រាប់ឲ្យដឹងថា៖ ដោយផ្អែកតាមចម្លើយសារភាពរបស់ជនសង្ស័យនិងមានបញ្ជាពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពី លោក កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរនោះ ជនសង្ស័យឈ្មោះជិន ជាតិនិងឈ្មោះវ៉ាន់ ចន្ធីហៅ វី ត្រូវបានកម្លាំងកងរាជអាវុធហត្ថខេត្តបញ្ជូនខ្លួននិងវត្ថុតាងទៅសាលាដំបូងចាត់ការតាមនីតិវិធីច្បាប់ ៕
ដោយ ៖ វណ្ណា
