សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ខណៈមេឃកំពុងភ្លៀងខ្លាំង ស្រាប់តែមានករណីគ្រោះថ្នាក់ចរាចរណ៍ដ៏រន្ធត់មួយបានកេីតឡេីងរវាងរថយន្តដឹកខ្សាច់ធុនធំមួយគ្រឿងបានបេីកបុក និងកិនម៉ូតូមួយគ្រឿងអូសជាច្រើនម៉ែត្ររងការខូចខាតយ៉ាងដំណំ និងបណ្ដាលឲ្យប្រុសស្រី២នាក់រងរបួសធ្ងន់ធ្ងរ រហូតបញ្ចូនទៅដល់មន្ទីរពេទ្យ អកុសលមាននារីម្នាក់បានដាច់ខ្យល់ស្លាប់ ។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានបង្កការភ្ញាក់ផ្អេីលកាលពីវេលាម៉ោង៨យប់ ថ្ងៃទី២១ ខែមីនា ឆ្នាំ២០២២ ស្ថិតនៅចំណុចស្តុបវត្តចាក់អង្រែក្រោម តាមបណ្ដោយផ្លូវជាតិលេខ២ ក្នុងសង្កាត់ចាក់អង្រែលេី ខណ្ឌមានជ័យ រាជធានីភ្នំពេញ ។
នារីរងគ្រោះឈ្មោះ ភឿន ស្រីនី អាយុ១៨ឆ្នាំ មុខរបរធ្វេីការនៅហាងអុីនធើណេត ស្នាក់នៅផ្ទះជួលក្បែរផ្ទះប្រធានភូមិ ភូមិទួលរកា២ សង្កាត់ចាក់អង្រែក្រោម ខណ្ឌមានជ័យ (ស្លាប់) ។ យុវជនជាអ្នកបេីកបរម៉ូតូឈ្មោះ អ៊ូ សុវណ្ណមករា អាយុ១៨ឆ្នាំ មានទីលំនៅជាប់ផ្លូវជាតិលេខ២ ក្នុងសង្កាត់ចាក់អង្រែលេី ខណ្ឌមានជ័យ (រងរបួសមួយចំហៀងខ្លួនធ្ងន់ធ្ងរ) ។
តាមប្រភពព័ត៌មានពីកន្លែងកេីតហេតុបានឲ្យដឹងថា នៅពេលកេីតហេតុ គឺមេឃបានភ្លៀងធ្លាក់យ៉ាងខ្លាំង ខណៈពេលនោះក៏មានប្រុសស្រី២នាក់ជិះម៉ូតូមួយគ្រឿងម៉ាក SUZUKI Nek ពណ៌ស ពាក់ផ្លាកលេខភ្នំពេញ 1HD-1500 បានឌុបគ្នាមកឈប់ស្តុបត្រង់ចំណុចកេីតហេតុ ស្របពេលនោះក៏មានរថយន្តធុនធំម៉ាក DONGFENG ពណ៌ស ពាក់ផ្លាកលេខភ្នំពេញ 3E-5725 បេីកបរដោយបុរសម្នាក់ធ្វេីដំណេីរស្របទិសគ្នា ទិសដៅពីលិចមកកេីត បំណងឆ្លងស្តុបបត់ស្ដាំទៅផ្លូវជាតិលេខ២ តែជ្រុលចង្កូតទៅបុកម៉ូតូ SUZUKI Nek ខាងលេី និងកិនអូសជិត១០ម៉ែត្ររងការខូចខាតយ៉ាងដំណំ ព្រមទាំងបណ្ដាលឲ្យប្រុសស្រី២នាក់ខាងលេីរងរបួសធ្ងន់ ត្រូវបានរថយន្តសាមុយដឹកបញ្ចូនទៅកាន់មន្ទីរពេទ្យដេីម្បីសង្គ្រោះភ្លាមៗ តែអកុសល នារីម្នាក់របួសធ្ងន់ធ្ងរពេកក៏បានដាច់ខ្យល់ស្លាប់ក្នុងមន្ទីរពេទ្យ ។
ក្រោយកេីតហេតុ តៃកុងរថយន្តបង្កបានចុះទៅឡេីងរថយន្តផ្សេងទៀតរហូតទៅដល់ក្នុងការដ្ឋានបូមខ្សាច់មួយកន្លែងជាប់ផ្លូវជាតិលេខ២ សង្កាត់ចាក់អង្រែលេី ខណ្ឌមានជ័យ ក៏ត្រូវបានសមត្ថកិច្ចមូលដ្ឋានចុះទៅឃាត់ខ្លួនយកមកអធិការដ្ឋាននគរបាលខណ្ឌមានជ័យ ដេីម្បីចាត់ការតាមច្បាប់ ។ ដោយឡែករថយន្តនិងម៉ូតូខាងលេី ត្រូវបានសមត្ថកិច្ចជំនាញ ធ្វេីការវាស់វែងយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំធ្វើការដោះស្រាយតាមនីតិវិធី ៕
ដោយ ៖ ភារ៉ា ដង្កោ
