សារព័ត៌មាន នគរវត្ត តែងតែនាំមុខគេជានិច្ច
ខេត្តត់ដំបង ៖ គ្រោះថ្នាក់ធម្មជាតិដ៏អាក្រក់មួយដែលកើតឡើងដោយសាររន្ទះបាញ់បណ្តាលឲ្យក្មេងប្រុសជំទង់ម្នាក់ស្លាប់បាត់បង់ជីវិតយ៉ាងអាណោចអធ័ម។
គ្រោះធម្មជាតិដែលកើតឡើងដោយសាររន្ទះបាញ់បណ្ដាលឲ្យមនុស្សស្លាប់បាត់បង់ជីវិតនេះកើតឡើងនៅវេលាម៉ោង ៤ និង ៣០ នាទីរសៀលថ្ងៃទី ២១ ខែមីនាឆ្នាំ ២០២២ នៅត្រង់ចំណុចតាមផ្លូវលំក្នុងចម្ការ ស្ថិតក្រុមទី០១ ភូមិដំណាក់សាលា ឃុំតាក្រី ស្រុកកំរៀង ខេត្តបាត់ដំបង។
តាមការបំភ្លឺពីឈ្មោះ ថុន ចាន់ណេត ភេទប្រុស អាយុ២១ឆ្នាំ រស់នៅភូមិតាក្រី ឃុំតាក្រី ស្រុកកំរៀង ខេត្តបាត់ដំបង បានបំភ្លឺប្រាប់សមត្ថកិច្ចថា ជនរងគ្រោះមានឈ្មោះ រស់ ភារម្យ ភេទប្រុស អាយុ១៦ឆ្នាំ ស្នាក់នៅភូមិតាក្រី ឃុំរតាក្រី ស្រុកកំរៀង ខេត្តបាត់ដំបង មុខរបរ កម្មករ ។ នៅថ្ងៃកើតហេតុ ខ្លួនបានបើកត្រាក់ទ័រទៅភ្ជួរដីនៅភូមិដំណាក់សាលា ។ លុះដល់ពេលរសៀល ត្រាក់ទ័ររបស់គាត់អស់ម៉ាស៊ូតក៏ទូរស័ព្ទហៅឈ្មោះ រស់ ភារម្យ (សាកសព) ឲ្យយកម៉ាស៊ូតមកឱ្យខ្លួន។ ពេលចាក់ម៉ាស៊ូតរួចមេឃរកភ្លៀងខ្លួននាំគ្នាត្រឡប់មកផ្ទះវិញដោយជនរងគ្រោះជាអ្នកជិះម៉ូតូពីមុខត្រាក់ទ័រ។ពេលជិះមកដល់ពាក់កណ្ដាលផ្លូវក៏ឮសូររន្ទះបាញ់ស្ទើរបែកក្រដាសត្រចៀក ហើយពេលខ្លួនបើកត្រាក់ទ័រមកដល់ឃើញឈ្មោះ ភារម្យ ដេកផ្កាប់មុខទៅលើដី បែរម៉ូតូរួចខ្លួនក៏ទៅលើកយកឃើញជនរងគ្រោះបានស្លាប់បាត់ទៅហើយ។
ក្រោយឃើញបែបនេះខ្លួនក៏ប្រញាប់ប្រញាល់រាយការណ៍ជូនទៅនគរបាលប៉ុស្តិ៍ដើម្បីចុះមកត្រួតពិនិត្យមើលសាកសព។បន្ទាប់មកកម្លាំងនគរបាលប៉ុស្តិ៍និងមន្ត្រីជំនាញនគរបាលស្រុកកំរៀង បានចុះមកធ្វើកោសល្យវិច័យហើយសន្និដ្ឋានថាជនរងគ្រោះពិតជាស្លាប់ដោយសាររន្ទះបាញ់ប្រាកដមែន។ក្រោយពីពិនិត្យសាកសពរួចសមត្ថកិច្ចជំនាញបានប្រគល់សាកសពឲ្យក្រុមគ្រួសារយកទៅធ្វើបុណ្យតាមប្រពៃណី៕
ដោយ ៖ ប្រាថ្នា
