សារព័ត៌មាន នគរវត្ត តែងតែនាំមុខគេជានិច្ច
ក្លិបនៅក្របខ័ណ្ឌ Premier League នឹងអាចធ្វើការដូរកីឡាករបាន៥នាក់ក្នុងមួយប្រកួតចាប់ពីរដូវកាលក្រោយ បន្ទាប់ពីម្ចាស់ភាគហ៊ុនយល់ព្រមផ្លាស់ប្តូរច្បាប់ដែលបានកំណត់។ ការប្តូរកីឡាករអាចធ្វើឡើង៣ដងក្នុងអំឡុងពេលប្រកួត បូកបន្ថែមនៅពាក់កណ្តាលតង់ ហើយអ្នកជំនួសសរុបចំនួន៩នាក់អាចត្រូវបានដាក់ឈ្មោះនៅលើបញ្ជីក្រុម។
ការជំនួសចំនួន៥ត្រូវបានណែនាំនៅទូទាំងការប្រកួតក្នុងខែឧសភា ឆ្នាំ២០២០ បន្ទាប់ពីការបិទដែលបណ្តាលមកពីជំងឺរាតត្បាត Covid-19 ។បន្ទាប់មកក្លិបបានបោះឆ្នោតប្រឆាំងនឹងការបន្តច្បាប់សម្រាប់រដូវកាល២០២០–២០២១ដែលបានកែប្រែ។
Premier League គឺជាការប្រកួតដ៏សំខាន់តែមួយគត់ដើម្បីអនុវត្តច្បាប់នេះ ពីព្រោះក្លិបមួយចំនួនមានអារម្មណ៍ថា វាផ្តល់ឱ្យអ្នកដែលមានក្រុមធំ ទទួលបានអត្ថប្រយោជន៍មិនយុត្តិធម៌។ អ្នកគ្រប់គ្រងមួយចំនួនបានប្រឆាំងនឹងការសម្រេចចិត្តនេះ ដោយលោក Jurgen Klopp គ្រូបង្វឹក Liverpool និងលោក Pep Guardiola គ្រូបង្វិកក្លិប Manchester City ទាំង២បាននិយាយថា វាទទួលខុសត្រូវមួយផ្នែកសម្រាប់ការរងរបួសសាច់ដុំរបស់កីឡាករនៅទូទាំងក្របខ័ណ្ឌកំពូលមួយនេះ។
គ្មានអ្វីផ្លាស់ប្តូរសម្រាប់រដូវកាល២០២១–២០២២ នោះទេ បើទោះបីជាកីឡាករជំនួសចំនួន៥នាក់ត្រូវបានអនុញ្ញាតក្នុងការប្រកួត FA Cup ហើយនៅក្នុងខែតុលាអ្នកបង្កើតច្បាប់បាល់ទាត់ ក្រុមប្រឹក្សាភិបាលសមាគមបាល់ទាត់អន្តរជាតិបានផ្តល់អនុសាសន៍ថា ការជំនួសកីឡាករចំនួន៥ត្រូវបានអនុវត្តជាអចិន្ត្រៃយ៍នៅក្នុងកីឡានេះ។
លោក Maheta Molango នាយកប្រតិបត្តិនៃសមាគមកីឡាករបាល់ទាត់អាជីពបាននិយាយកាលពីថ្ងៃសុក្រថា “ការអនុម័តច្បាប់នេះគឺជាការស្វាគមន៍មួយឆ្ពោះទៅមុខក្នុងអ្វីដែលចាំបាច់ត្រូវមានកិច្ចខិតខំប្រឹងប្រែងជាបន្តបន្ទាប់ដើម្បីដោះស្រាយបញ្ហាជាមួយនឹងការអស់កម្លាំងរបស់កីឡាករ” ។
នៅក្នុងកិច្ចប្រជុំម្ចាស់ភាគហ៊ុននៃក្លិប Premier League ទាំង២០ ត្រូវបានបញ្ជាក់ផងដែរថា ទីផ្សារដោះដូរកីឡាកររដូវក្តៅនេះនឹងបើកនៅថ្ងៃទី១០ ខែមិថុនា ហើយនឹងបិទនៅម៉ោង១២អធ្រាត្រ នៅថ្ងៃទី១ ខែកញ្ញា ស្របតាមលីគអឺរ៉ុបផ្សេងទៀត។ លើសពីនេះ Premier League នឹងដកចេញការធ្វើតេស្ត២ដងក្នុងមួយសប្តាហ៍លើកីឡាករ និងបុគ្គលិកចាប់ពីថ្ងៃទី៤ ខែមេសា ហើយផ្លាស់ប្តូរទៅការធ្វើតេស្តរោគសញ្ញាតែប៉ុណ្ណោះ។
ការអនុវត្តថ្មីៗសំខាន់ៗផ្សេងទៀតរួមមានការដកចេញនូវតម្រូវការសម្រាប់លិខិតឆ្លងដែន, ការពិនិត្យនៅគ្លីនិកដើម្បីចូលទៅកាន់តំបន់ដែលបានដាក់កម្រិតពីមុននៅកន្លែងហ្វឹកហាត់ និងនៅថ្ងៃប្រកួត ដោយសារ Premier League ត្រឡប់ទៅប្រតិបត្តិការអាជីវកម្មដូចធម្មតា។
សេចក្តីថ្លែងការណ៍របស់ Premier League បានឲ្យដឹងថា សុខុមាលភាពរបស់កីឡាករ និងបុគ្គលិកនៅតែជាអាទិភាព ហើយ Premier League នឹងបន្តតាមដានស្ថានភាព Covid-19 ថ្នាក់ជាតិ និងកែសម្រួលពិធីសារទូទាំងលីគតាមតម្រូវការ ស្របតាមការណែនាំចុងក្រោយពីអាជ្ញាធរសុខភាពសាធារណៈ និង អ្នកជំនាញផ្នែកវេជ្ជសាស្រ្ដ ៕
ដោយ៖ ភារៈ(រូបភាព ៖ BBC Sport)
