សារព័ត៌មាន នគរវត្ត តែងតែនាំមុខគេជានិច្ច
ក្លិប Olympique Lyonnais បានចុះហត្ថលេខាលើខ្សែបម្រើសញ្ជាតិប្រេស៊ីល Tete មកពីក្លិប Shakhtar Donetsk របស់អ៊ុយក្រែន រហូតដល់ចុងបញ្ចប់នៃរដូវកាលនេះ។ នេះបើយោងតាមក្លិបនៅលីគកំពូលបារាំងLigue 1 បានប្រកាសកាលពីថ្ងៃសុក្រ ទី១ ខែមេសា។
ការផ្លាស់ប្តូរនេះធ្វើឡើងបន្ទាប់ពីការសម្រេចចិត្តរបស់ FIFA ក្នុងការអនុញ្ញាតឱ្យក្លិបនានាចុះហត្ថលេខាលើកីឡាករពីក្រុមអ៊ុយក្រែននៅខាងក្រៅទីផ្សារដោះដូរកីឡាករ ដើម្បីជួយអ្នកដែលរងផលប៉ះពាល់ដោយការលុកលុយរបស់រុស្ស៊ីលើអ៊ុយក្រែន។
Tete វ័យ២២ឆ្នាំបានបង្ហាញខ្លួន១០៨ប្រកួតចាប់តាំងពីចូលរួមជាមួយក្រុមShakhtar ពីក្រុមប្រេស៊ីល Gremio ក្នុងឆ្នាំ២០១៩ ដោយស៊ុតបញ្ចូលទីបាន៣១គ្រាប់នៅក្នុងការប្រកួតទាំងអស់។ គាត់បានជួយក្រុមឱ្យឈ្នះពានរង្វាន់ Ukrainian Cup ក្នុងឆ្នាំ២០១៩ និងពានរង្វាន់លីគកំពូលអ៊ុយក្រែន Ukrainian Premier League ចំនួន២ដងផងដែរ។
ក្លិប Lyon បានប្រកាសនៅក្នុងសេចក្តីថ្លែងការណ៍ថា “ការមកដល់របស់ Tete គឺដើម្បីពង្រឹងក្រុមរបស់លោក Peter Bosz នៃការប្រកួតក្នុង Ligue1” ។
Lyon ឈរនៅលេខរៀងទី១០ ក្នុងតារាងលីគកំពូលបារាំង ខណៈនៅសល់៩ប្រកួតទៀត ហើយពួកគេនឹងត្រូវធ្វើជាម្ចាស់ផ្ទះទទួលក្រុម Angers ចំណាត់ថ្នាក់លេខ១៤នៅថ្ងៃអាទិត្យនេះ។
ក្រុមនេះក៏ស្ថិតក្នុងវគ្គជម្រុះនៃ Europa League ដែលការប្រកួតនេះ កីឡាករ Tete អាចនឹងបង្ហាញខ្លួនពេល Lyon ត្រូវជួបជាមួយក្រុម West Ham United ក្នុងវគ្គ 1/4 ផ្តាច់ព្រ័ត្រនៅខែក្រោយ ៕
ដោយ៖ ភារៈ(រូបភាព ៖ CNA)
