សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ បុរសម្នាក់បានស្លាប់នៅនឹងកន្លែងកើតហេតុភ្លាមៗ ខណៈដែលកំពុងតែដើរឆ្លងផ្លូវហើយមានរថយន្តមួយគ្រឿងបើកមកបុក រួចហើយអ្នកបើកបរបានរត់គេចខ្លួនបាត់ស្រមោលទៅ។
ហេតុការណ៍នេះបានកើតឡើងកាលពីថ្ងៃចន្ទ ៣កើត ខែចេត្រ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៤ ខែមេសា ឆ្នាំ២០២២ វេលាម៉ោង២២និង១០នាទីយប់ ស្ថិតនៅលើផ្លូវលេខ២២ ត្រង់ចន្លោះគីឡូម៉ែត្រលេខ៥និងលេខ៦ក្នុងភូមិធ្នង់រលើង ឃុំលាយបូរ ស្រុកត្រាំកក់ ខេត្តតាកែវ ។
សមត្ថកិច្ចបានឱ្យដឹងថា ករណីគ្រោះថ្នាក់ខាងលើនេះបង្កឡើងដោយរថយន្តមួយគ្រឿងម៉ាកឡិចសុីសRX400h ពណ៌ផ្ទៃមេឃ គ្មានពាក់ស្លាកលេខ(អ្នកបើកបរបានគេចខ្លួនបាត់)ដែលបើកបរមកពីទិសខាងកើត លុះបើកបរមកដល់ចំណុចខាងលើក៏បានបុកអ្នកថ្មើរជើងម្នាក់ឈ្មោះអ៊ុក ប្រុសភេទប្រុស អាយុ៣០ឆ្នាំ នៅភូមិអង្គសុភី ឃុំអង្គសុភី ស្រុកកំពង់ត្រាច ខេត្តកំពតមុខរបរកសិករ(ស្លាប់នៅនឹងកន្លែងកើតហេតុ)ពេលគាត់ដើរឆ្លងផ្លូវពីត្បូងទៅជើង។
ក្រោយកើតហេតុសមត្ថកិច្ចជំនាញបានចុះទៅដល់ទីតាំងដើម្បីធ្វើការត្រួតពិនិត្យនិងវាស់វែង ហើយសាកសពបានប្រគល់ជូនសាច់ញាតិយកទៅធ្វើបុណ្យតាមប្រពៃណី។
សមត្ថកិច្ចបានបញ្ជាក់ទៀតថា ករណីគ្រោះថ្នាក់ខាងលើនេះកើតឡើងដោយសាររថយន្តបើកបរក្នុងល្បឿនលឿន។
បច្ចុប្បន្ន កម្លាំងជំនាញកំពុងកសាងសំណុំរឿងទៅតាមនីតិវិធី រីឯវត្ថុតាងខាងលើរងការខូចខាតធ្ងន់ត្រូវបានយកមករក្សាទុកនៅអធិការដ្ឋាននគរបាលស្រុកត្រាំកក់៕
ដោយ៖ ស សម
