សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅរសៀលថ្ងៃទី១២ ខែមេសា ឆ្នាំ២០២២ លោករដ្ឋមន្ត្រី ក្រសួងអប់រំយុវជននិងកីឡា បានចេញលិខិតជូនពរ គោរពជូន ថ្នាក់ដឹកនាំ បុគ្គលិកអប់រំ និងលោកគ្រូ អ្នកគ្រូ នៃក្រសួងអប់រំ យុវជន និងកីឡា ក្នុងឱកាសចូលឆ្នាំថ្មីប្រពៃណីជាតិ ឆ្នាំ ខាល ចត្វាស័ក ព.ស. ២៥៦៦ គ.ស. ២០២២
-ឯកឧត្តម លោកជំទាវ លោក លោកស្រី ជាថ្នាក់ដឹកនាំ និងបុគ្គលិកអប់រំទាំងអស់ -លោកគ្រូ អ្នកគ្រូ ជាទីរាប់អាន!
ក្នុងឱកាសចូលឆ្នាំថ្មីប្រពៃណីជាតិ ឆ្នាំខាល ចត្វាស័ក ពស. ២៥៦៦ គ.ស. ២០២២ ព្រះនាម កិរិណី ទេវី ដែលនឹងប្រព្រឹត្តទៅនៅថ្ងៃ១៣-១៤-១៥ កើត ខែចេត្រ ត្រូវនឹងថ្ងៃទី ១៤-១៥-១៦ ខែមេសា ឆ្នាំ២០២២ នាពេលខាងមុខនេះ ខ្ញុំសូមសម្តែងនូវមនោសញ្ចេតនា – សោមនស្សរីករាយឥតឧបមា និងសូមលើកហត្ថបួងសួង ដល់ទេវតាថែរក្សាទឹកដីព្រះរាជាណាចក្រកម្ពុជា គុណបុណ្យព្រះរតនត្រ័យកែវទាំងបី វត្ថុស័ក្តិសិទ្ធិទាំងឡាយក្នុង លោក សូមមេត្តាជួយអភិបាលប្រោះព្រំសព្ទសាធុការពរគ្រប់ប្រការជូនឯកឧត្តម លោកជំទាវ លោក លោកស្រី បុគ្គលិកអប់រំ លោកគ្រូ អ្នកគ្រូទាំងអស់ នៃក្រសួងអប់រំ យុវជន និងកីឡា សូមបានប្រកបដោយកាយពលរឹងមាំ បញ្ញាញាណភ្លឺថ្លា សុខភាពល្អបរិបូណ៍ ជន្មាយុយឺនយូរ សុភមង្គលក្នុងគ្រួសារ។
ខ្ញុំតែងបានចងចាំ និងកត់ត្រាទុកជាប់ជានិច្ច នូវការលះបង់កម្លាំងកាយ កម្លាំងចិត្តរបស់ ឯកឧត្តម លោកជំទាវ លោក លោកស្រី លោកគ្រូ អ្នកគ្រូទាំងអស់ ក្នុងការចូលរួមអភិវឌ្ឍវិស័យអប់រំនៅកម្ពុជា តាមរយៈ ការគាំទ្រ និងចូលរួមអនុវត្តកម្មវិធីកំណែទម្រង់របស់ក្រសួងអប់រំ យុវជន និងកីឡា ជាពិសេសការខិតខំប្រឹងប្រែង ក្នុងដំណាក់កាលនៃការប្រយុទ្ធប្រឆាំងនឹងជំងឺកូវីដ-១៩ ដោយរក្សាបាននូវសុវត្ថិភាពសិក្សា សម្រាប់បុគ្គលិកអប់រំ និងនិរន្តភាពនៃការសិក្សារបស់សិស្សានុសិស្ស និងនិស្សិត ប្រកបដោយប្រសិទ្ធភាព។
សូម ឯកឧត្តម លោកជំទាវ លោក លោកស្រី លោកគ្រូ អ្នកគ្រូទាំងអស់មេត្តាទទួលនូវគារវកិច្ច និង ការរាប់អានដ៏ស្មោះពីខ្ញុំ ៕
ដោយ ៖ សិលា
