សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្មករ-កម្មការិនី ក្រុមហ៊ុន ឃែនធើរេន អឹបភែរឹលជាង៤០០នាក់បាននាំគ្នាធ្វេីការបិទផ្លូវសាធារណៈដើម្បីតវ៉ាក្រោយពីតំណាងក្រុមហ៊ុនលួចដឹកអីវ៉ាន់ចេញមិនគោរពកិច្ចសន្យា។
ការបិទផ្លូវតវ៉ាខាងលេីនេះបានធ្វេីឡេីងនាព្រឹកថ្ងៃទី១៩ ខែមេសា ឆ្នាំ២០២២ នៅចំណុចមុខរោងចក្រ ក្រុមហ៊ុន ឃែនធើរេន អឹបភែរឹល ស្ថិតនៅតាមបណ្តោយមហាវិថីចោមចៅ ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
សូមបញ្ជាក់ថា ទីតាំងរោងចក្រខាងលេីនេះកន្លងមកក៏ធ្លាប់មានកម្មករកម្មការិនីធ្វេីបាតុកម្មបិទផ្លូវម្តងជាពីរដងមកហេីយដោយសារក្រុមហ៊ុនមិនបេីកប្រាក់បៀវត្សទៀងទាត់ហេីយលួចដឹកអីវ៉ាន់ចេញពីក្រុមហ៊ុន ។ ក្រោយពីមានការបិទផ្លូវមិនឱ្យធ្វើចរាចរណ៍បង្កការកកស្ទះមក ក៏មានអាជ្ញាធរមូលដ្ឋានចុះមកធ្វេីការសម្របសម្រួលនិងឱ្យក្រុមហ៊ុនធ្វេីកិច្ចសន្យាបញ្ឈប់ការដឹកអីវ៉ាន់ចេញរយៈពេល៦ខែពោលគឺដោះស្រាយប្រាក់បៀវត្សជូនកម្មករ កម្មការិនីរួចរាល់ទេីបអាចដឹកចេញបាន។
តំណាងកម្មករ បានបញ្ជាក់ថា មូលហេតុនៃការបិទផ្លូវម្តងទៀតនេះគឺដោយសារតែក្រុមហ៊ុនមិនគោរពតាមកិច្ចសន្យាលួចដឹកអីវ៉ាន់ចេញ ខណៈដែលបងប្អូនកម្មករ កម្មការិនីឈប់សម្រាកនៅថ្ងៃចូលឆ្នាំថ្មីប្រពៃណីជាតិខ្មែរ ទេីបត្រឡប់មកវិញក៏នាំគ្នាបិទផ្លូវសាជាថ្មីដេីម្បីឲ្យអាជ្ញាធរពាក់ព័ន្ធជួយធ្វើអន្តរាគមន៍។
លោក ប៉ាង លីដា អភិបាលរងខណ្ឌពោធិ៍សែនជ័យ បញ្ជាក់ថា ចំពោះការបិទផ្លូវកាលពីព្រឹកមិញ នៅមុខក្រុមហ៊ុន ឃែនធើរេន អឹបភែរឹល បានបើកឱ្យដំណើរការដូចធម្មតាវិញហើយ។
លោកបន្តថា នៅវេលាម៉ោង១៤និង ៣០នាទី ថ្ងៃទី២០ មេសា ២០២២ ភាគីកម្មករ និងតំណាងក្រុមហ៊ុននឹងអញ្ជើញមកធ្វើការសម្របសម្រួលគ្នានៅសាលាខណ្ឌពោធិ៍សែនជ័យ៕
ដោយ៖សុខាសែនជ័យ
