សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្លាំងអន្តរាគមន៍ នៃអធិការដ្ឋាននគរបាលខណ្ឌដង្កោ បានចេញល្បាតក្នុងមូលដ្ឋាននិងបានធ្វើការឃាត់ខ្លួនក្រុមជនសង្ស័យចំនួន៤នាក់ជាបន្តបន្ទាប់ ដែលពាក់ព័ន្ធករណីរក្សាទុកដោយខុសច្បាប់នូវសារធាតុញៀន និងផ្តល់ទីតាំងប្រើប្រាស់គ្រឿងញៀន និងកាន់កាប់អាវុធដោយគ្មានការអនុញ្ញាត កាលពីថ្ងៃទី២៥ ខែមេសា ឆ្នាំ២០២២ វេលាម៉ោង២១ និង០០នាទី នៅត្រង់ចំណុចផ្លូវបេតុង ស្ថិតអន្លង់គងថ្មី សង្កាត់ព្រៃស ខណ្ឌដង្កោ រាជធានីភ្នំពេញ។
លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោបានឱ្យដឹងថា ជនសង្ស័យចំនួន០៤នាក់ រួមមាន៖ ទី១-ឈ្មោះ សួង ភារម្យ ភេទប្រុស អាយុ ៣០ឆ្នាំ ជនជាតិខ្មែរ មុខមិនពិតប្រាកដ មានទីលំនៅភូមិព្រៃវែង សង្កាត់ព្រៃវែង ខណ្ឌដង្កោ រាជធានីភ្នំពេញ, ទី២-ឈ្មោះ សួន ចិត្រា ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិទំពាំងទ្វា សង្កាត់ពងទឹក ខណ្ឌដង្កោ រាជធានីភ្នំពេញ, ទី៣-ឈ្មោះ បូរ សុលី ភេទប្រុស អាយុ២២ឆ្នាំ មុខរបរមិនពិតប្រាកដ មានទីលំនៅភូមិពងទឹក សង្កាត់ពងទឹក ខណ្ឌដង្កោ រាជធានីភ្នំពេញ និងទី៤-ឈ្មោះ ផន សុផាន់នី អាយុ៣២ឆ្នាំ មុខរបរមិនពិតប្រាកដ មានទីលំនៅភូមិព្រៃវែងខាងលិច សង្កាត់ព្រៃវែង ខណ្ឌដង្កោ រាជធានីភ្នំពេញ។
វត្ថុតាងចាប់យកមាន៖ ម្សៅក្រាមពណ៌សថ្លា ចំនួន០១កញ្ចប់ថង់តូច, ពូថៅប្រវែង៣០សង់ទីម៉ែត្រចំនួន១, កាំបិតផ្គាក់ប្រវែង៦០សង់ទីម៉ែត្រចំនួន១, ដែកឆាបប្រវែង៣៩សង់ទីម៉ែត្រចំនួន១, ទូរស័ព្ទ ម៉ាកNOKIA អិនចុចពិលពណ៌ខ្មៅចំនួន១គ្រឿង។
លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានបន្តថា នៅថ្ងៃទី២៥ ខែមេសា ឆ្នាំ២០២២ វេលាម៉ោង២១និង០០នាទី កម្លាំងសមត្ថកិច្ចនគរបាលខណ្ឌដង្កោ បានចេញល្បាតក្នុងមូលដ្ឋាន ពេលមកដល់ចំណុចផ្លូវបេតុង ស្ថិតនៅភូមិអន្លង់ថ្មី សង្កាត់ព្រៃស ខណ្ឌដង្កោ រាជធានីភ្នំពេញ ឃើញជនសង្ស័យចំនួន០២នាក់(ឈ្មោះ សួង ភារម្យ និង ឈ្មោះ បូរ សុលី) កំពុងដើរពេលនោះសមត្ថកិច្ចយើងមានការសង្ស័យក៏បានហៅឱ្យឈប់ដើម្បីត្រួតពិនិត្យឆែកឆេរ ស្រាប់តែរកឃើញម្សៅក្រាមពណ៌សថ្លាចំនួន១កញ្ចប់តូច ដែលជនសង្ស័យឈ្មោះ សួង ភារម្យ បានទម្លាក់ចោលនៅលើផ្លូវបេតុង ហើយសមត្ថកិច្ចយើងក៏បានឃាត់ខ្លួនជនសង្ស័យទាំង០២នាក់ខាងលើ រួមទាំងវត្ថុតាងយកមកសាកសួរនៅអធិការដ្ឋាននគបាលខណ្ឌដង្កោ។ ក្រោយពេលសាកសួរ សមត្ថកិច្ចបានបន្តឃាត់ខ្លួនបក្ខពួកជនសង្ស័យចំនួន២នាក់ទៀត(ឈ្មោះ ផន សុផាននី និង ឈ្មោះ សួន ចិត្រា) នៅចំណុចផ្លូវលំ ផ្ទះគ្មានលេខ ស្ថិតនៅភូមិព្រៃវែងខាងលិច សង្កាត់ព្រៃវែង ខណ្ឌដង្កោ រាជធានីភ្នំពេញ រួមទាំងវត្ថុតាំង(ពូថៅ០១,កាំបិតផ្គាក់០១,ដែកឆាប០១, ទូរស័ព្ទ ០១គ្រឿង)យកមកអធិការដ្ឋាននគបាលខណ្ឌដង្កោ ដើម្បីអនុវត្តតាមនីតិវិធី។
បច្ចុប្បន្ននេះ ជនសង្ស័យខាងលើកំពុងឃាត់ខ្លួននៅអធិការនគរបាលខណ្ឌដង្កោ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិច្បាប់៕
ដោយ ៖ ភារ៉ា ដង្កោ
