សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ យោងតាមរបាយការណ៍ពីសមត្តកិច្ចនគរបាលចរាចរណ៍ផ្លូវគោកនៃស្នងការដ្ឋានខេត្តប៉ៃលិនបានឱ្យដឹងថា នៅវេលាម៉ោង១៩និង០៥នាទីយប់ថ្ងៃទី២៨ ខែមេសា ឆ្នាំ២០២២ មានករណីគ្រោះថ្នាក់ចរាចណ៍មួយបានកើតឡើងរវាងរថយន្ដកែច្នៃនឹងម៉ូតូនៅភ្នំដំបង ស្ថិតក្នុងភូមិក្រចាប់ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដោយសាររថយន្តកែច្នៃបើកបរក្នុងទិសដៅពីត្បូងទៅជើងរួចហើយបើកទៅចូលខាងស្ដាំដៃបុកអ្នកបើកម៉ូតូដែលកំពុងបើកបរពីជើងទៅត្បូងបណ្ដាលឱ្យដួលទៅលើផ្លូវថ្នល់កៅស៊ូធ្វើឱ្យអ្នកជិះម៉ូតូស្លាប់ម្នាក់និងរងរបួសធ្ងន់ម្នាក់នៅនឹងកន្លែងកើតហេតុតែម្តង។
ក្រោយមកសមត្ថកិច្ចនគរបាលជំនាញចរាចរណ៍នៃស្នងការដ្ឋានខេត្តបានចុះមកធ្វើការវាស់វែង រួចក៏ហៅរថយន្តរបស់មន្ទីរពេទ្យបង្អែកខេត្តប៉ៃលិនមកដឹកបញ្ជូនជនរងគ្រោះយកទៅព្យាបាល រីឯសពជនរងគ្រោះរង់ចាំក្រុមគ្រួសារមកយកទៅធ្វើបុណ្យ។
សមត្តកិច្ចនគរបាលជំនាញនៃស្នងការដ្ឋានខេត្តបានបន្តថា ករណីគ្រោះថ្នាក់ចរាចរណ៍ខាងលើបណ្ដាលឱ្យមនុស្សម្នាក់ស្លាប់និងម្នាក់ទៀតងរបួសធ្ងន់ រីឯម៉ូតូខូចខាត១គ្រឿងធ្ងន់ ចំណែករថយន្តកែច្នៃបង្កហេតុរងការខូចខាតស្រាល។
ករណីខាងលើបង្កឡើងដោយអ្នកបើករថយន្តកែច្នៃ ដែលមានម្ចាស់ឈ្មោះ ឆេង ធាន ភេទប្រុស អាយុ២៧ឆ្នាំ មុខរបរកសិករ មានទីលំនៅភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន រងរបួសស្រាល។
អ្នកបើកបរម៉ូតូឈ្មោះ ម៉ី ឌីណា ភេទប្រុស អាយុ៣០ឆ្នាំ មានមុខរបរកសិករ រស់នៅភូមិសំឡូត ឃុំសំឡូត ស្រុកសំឡូត ខេត្តបាត់ដំបង (ស្លាប់នៅនឹងកន្លែងកើតហេតុ) បេីកបរម៉ូតូម៉ាកHONDA Dream ពណ៌ខ្មៅ ពាក់ស្លាកលេខពោធិ៍សាត់ 1C-7429 រងការខូចខាតធ្ងន់។
មូលហេតុដែលបណ្តាលឲ្យមានគ្រោះថ្នាក់គឺមកពីកត្តាមនុស្ស(បើកបររថយន្តមិនប្រកាន់ស្តាំ)។
សមត្តកិច្ចនគរបាលជំនាញបានបន្តទៀតថា ករណីខាងលើនេះការិយាល័យនគរបាលចរាចរណ៍ផ្លូវគោកបានប្រគល់សាកសពជូនសាច់ញាតិយកទៅធ្វើបុណ្យតាមប្រពៃណីខ្មែរ ហើយវត្ថុតាងត្រូវបានយកមករក្សាទុកនៅការិយាល័យដើម្បីអនុវត្តតាមនីតិវិធីច្បាប់៕
ដោយ៖ស សារ៉េត
