សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ ៖ បុរសម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុនៃឧបទ្ទវហេតុគ្រោះថ្នាក់ចរាចរណ៍រវាងម៉ូតូនឹងម៉ូតូ។ ចំណែកភាគីម្ខាងទៀតបានរត់គេចខ្លួនបាត់ស្រមោល។ហេតុការណ៍នេះបានកើតឡើងនៅវេលាម៉ោង៥និង៣០នាទីព្រឹកថ្ងៃទី៦ ខែឧសភា ឆ្នាំ២០២២នៅលើផ្លូវក្រាលក្រួសក្រហមស្ថិតក្នុងភូមិរំចេក ឃុំត្នោត ស្រុកបាទី ខេត្តតាកែវ។
សមត្ថកិច្ចបានឱ្យដឹងថា គ្រោះថ្នាក់ចរាចរណ៍ខាងលើនេះកើតឡើងរវាងម៉ូតូនឹងម៉ូតូក្នុងទិសដៅបើកបញ្ច្រាសគ្នាពីត្បូងទៅជើង បង្កដោយម៉ូតូម៉ាកស្គូពីពណ៌ក្រហមបើកមកពីទិសខាងត្បូងតែអ្នកបើកបរមិនស្គាល់ឈ្មោះព្រោះក្រោយកើតហេតុបានបើករត់គេចបាត់ បានបុកជាមួយនឹងម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០០៥បើកបរដោយឈ្មោះឆេង ម៉ៅ ភេទប្រុសអាយុ៥៥ឆ្នាំ មុខរបរកសិករ មានទីលំនៅភូមិបឹងលាច ឃុំចំបក់ ស្រុកបាទី ខេត្តតាកែវ បានស្លាប់នៅនឹងកន្លែងកើតហេតុ។
ក្រោយកើតហេតុសមត្ថកិច្ចបានចុះទៅធ្វើការវាស់វែង ចំណែកសពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
ដោយ៖ ស សម
