អគ្គិភ័យឆេះផ្ទះល្វែងនៅចំណុចបុរី​សូនី បង្កការភ្ញាក់ផ្អើលដល់សមត្ថកិច្ចចុះធ្វើអន្តរាគមន៍ទាំងយប់

ភ្នំពេញ ៖ នៅវេលាម៉ោង២៖៣០នាទីរំលងអធ្រាត្រឈានចូល ថ្ងៃចន្ទ ១រោច ខែពិសាខ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៦ ខែឧសភា ឆ្នាំ២០២២ មានករណីអគ្គិភ័យបានឆាបឆេះផ្ទះមួយកន្លែងដែលស្ថិតនៅក្នុងបុរី​សូនី​ ផ្ទះលេខ៣៣១A ផ្លូវលេខ៨១៥០ny ភូមិឫស្សី​ សង្កាត់ស្ទឹងមានជ័យទី៣​ ខណ្ឌមានជ័យ រាជធានីភ្នំពេញ។

     ហេតុការណ៍អគ្គិភ័យឆាបឆេះនេះ បណ្តាលមកពីការដុតទៀនធូបបង្កជាអគ្គិភ័យធ្វើឲ្យឆេះខូចខាតសម្ភារប្រេីប្រាស់មួយចំនួន​ដូចជា ពួក​ គ្រែ​ តែពុំបានឆេះរាលដាលដល់ផ្ទះអ្នកជិតខាងឡើយ។ ផ្ទះដែលរងគ្រោះខាងលើជាប្រភេទសំណង់ ថ្មបេតុង ដែលមានទំហំ (៤ម៉ែត្រ x ១៦ម៉ែត្រ)។

    នៅវេលាម៉ោង២៖៤០នាទីនាថ្ងៃខែឆ្នាំដដែល អគ្គិភ័យនេះត្រូវពន្លត់បានទាំងស្រុង ដោយប្រើប្រាស់រថយន្តការិយាល័យអគ្គិភ័យ រាជធានីភ្នំពេញ ចំនួន ២គ្រឿង ប្រើប្រាស់ទឹកអស់ ១ឡាន ស្មើនឹង ៤ម៉ែត្រគូប៕

ដោយ ៖ ភារ៉ា ដង្កោ