សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ ៖ បុរសម្នាក់បានស្លាប់ភ្លាមៗនៅនឹងកន្លែងកេីតហេតុ ខណៈដែលគាត់កំពុងកាត់ទុយយោដើម្បីតទឹក ហើយបាក់ផ្លែម៉ូទ័រខ្ទាតត្រូវចំ.ក បង្កការភ្ញាក់ផ្អើលកាលពីវេលាម៉ោង១១ និង៣០នាទីព្រឹកថ្ងៃទី២២ ខែឧសភាម្សិលមិញនេះ ស្ថិតនៅក្នុងភូមិថ្នល់ថ្មី ឃុំបារាយណ៍ ស្រុកបារាយណ៍ ខេត្តកំពង់ធំ។ នេះបេីយោងតាមប្រភពព័ត៌មានពីនគរបាលខេត្តកំពង់ធំ ដែលយើងទទួលបាននៅព្រឹកថ្ងៃចន្ទទី២៣ ខែឧសភា ឆ្នាំ២០២២។
តាមរបាយការណ៍ដដែលបន្តថា សពជនរងគ្រោះនៅក្នុងឧបទ្ទវហេតុនេះ ឈ្មោះ ទា សាយគ្រី ភេទប្រុស អាយុ៦៨ឆ្នាំ រស់នៅភូមិកើតហេតុ។
យោងតាមការឆ្លេីយបំភ្លឺពីប្រពន្ធជនរងគ្រោះ ឈ្មោះ ជា ណារី អាយុ ៦២ឆ្នាំ បានឱ្យដឹងថា មុនពេលកើតហេតុ ប្ដីរបស់គាត់កំពុងតែកាត់ទុយយោជ័រ រៀបចំតទឹកសម្រាប់ប្រើប្រាស់នៅក្នុងផ្ទះ។ ចំណែករូបគាត់នៅធ្វើម្ហូប និងរៀបចំផ្ទះ។ មួយសន្ទុះក្រោយមក បន្ទាប់ពីគាត់ធ្វើម្ហូបឆ្អិនរួចហើយ គាត់ក៏បានទៅហៅប្តីគាត់ មកពិសាបាយជាមួយគ្នា។ ដោយប្តីគាត់ប្រាប់ថា ដូសបាយទៅ គាត់ទៅឥឡូវហើយ ពេលនោះគាត់ក៏នៅឈរមើលប្តីគាត់កាត់ទុយយោបន្តទៀត។ ភ្លាមៗនោះ ក៏ឮស្នូរសំឡេងឈីប ស្រាប់តែឃើញប្តីរបស់គាត់ដួលផ្ងារអុកគូទ។ ឃើញដូច្នេះ គាត់ក៏ស្ទុះមកត្រកងប្តីរបស់គាត់ ហើយក៏បានឃើញបំណែកផ្លែម៉ូទ័រមុតនៅជាប់នឹងកប្ដីគាត់ និងស្រែកហៅឱ្យគេជួយដកបំណែកផ្លែម៉ូទ័រ ក្រោយពីដករួចហើយ ឈាមហូរចេញយ៉ាងខ្លាំងដូចអារ.កមាន់អ៊ីចឹង។
ភ្លាមនោះអ្នកជិតខាងបានមកជួយលើកប្តីគាត់ដាក់លើរថយន្តយកទៅមន្ទីរពេទ្យ។ ពេលបញ្ជូនដល់មន្ទីរពេទ្យ ប្តីរបស់គាត់បានដាច់ខ្យល់ស្លាប់បាត់ទៅហើយ។
ក្រោយកេីតហេតុកម្លាំងជំនាញរបស់នគរបាលប៉ុស្តិ៍ អនុភូមិ រួមទាំងក្រុមប្រឹក្សាឃុំបារាយណ៍ គ្រូពេទ្យមណ្ឌលសុខភាព បានចុះដល់កន្លែងកើតហេតុ និងពិនិត្យសាកសព គឺមានស្នាមមុតរយះចំត្រង់ក ខាងស្ដាំចំហៀងខាងមុខ ប្រវែង ១០សម×៦សម ជម្រៅដល់ឆ្អឹង (ដាច់សរសៃក)។ ចំណែកផ្នែកដងខ្លួន គឺពុំមានស្នាកស្នាមអ្វីគួរឱ្យកត់សម្គាល់ឡើយ។ យោងតាមការពិនិត្យកន្លែងកើតហេតុ និងសាកសព ក្រុមមន្ត្រីជំនាញបានសន្និដ្ឋានថា បុរសរងគ្រោះ បានស្លាប់ដោយសារផ្លែម៉ូទ័របាក់ខ្ទាតត្រូវចំក។
ចំណែកសពត្រូវបានធ្វើកំណត់ហេតុ និងប្រគល់ជូនឈ្មោះ ជា ណារី ដែលជាប្រពន្ធដើម្បីធ្វើបុណ្យតាមប្រពៃណី៕
ដោយ៖អារុណរះ
