សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសវ័យចំណាស់ម្នាក់ កាលពីព្រឹកថ្ងៃទី២៧ ខែឧសភា ឆ្នាំ២០២២ ត្រូវបានកម្លាំងសមត្តកិច្ចការិយាល័យព្រហ្មទណ្ឌកងរាជអាវុធហត្ថរាជធានីភ្នំពេញ ឃាត់ខ្លួនបញ្ជូនទៅតុលាការ ពាក់ព័ន្ធពីបទ ឆបោក និង ក្លែងបន្លំឯកសារសាធារណៈ ។
បុរសវ័យចំណាស់រូបនោះឈ្មោះ ខ័ន្ធ សោភ័ណ អាយុ៥៨ ឆ្នាំ មុខរបរ ជាមន្ត្រីរាជការ មានទីលំនៅផ្ទះលេខ ១៤២E២ ផ្លូវលេខ១៩ ភូមិ៣ សង្កាត់ជ័យជម្នះ ខណ្ឌដូនពេញ រាជធានីភ្នំពេញ ។ ជនសង្ស័យត្រូវបានកម្លាំងកងរាជអាវុធហត្ថឃាត់ខ្លួនតាមដីកាបង្គាប់ឲ្យចាប់ខ្លួនរបស់លោក កុល កំពូល ចៅក្រមស៊ើបសួរសាលាដំបូងរាជធានីភ្នំពេញ តាមដីកាសន្និដ្ឋានសំណុំរឿងស៊ើបសួររបស់អយ្យការអមសាលាដំបូង បានសម្រេចបើកការស៊ើបសួរលើឈ្មោះ ខ័ន្ធ សោភ័ណ ពីបទ ឆបោក និង ក្លែងបន្លំឯកសារសាធារណៈប្រព្រឹត្តនៅចំណុចរាជធានីភ្នំពេញ កាលពីអំឡុងខែមករា ឆ្នាំ២០២០ ថ្ងៃទី១ ខែសីហា ឆ្នាំ២០២០ និង ថ្ងៃទី៣០ ខែតុលា ឆ្នាំ២០២០ ដែលបទចោទនេះយោងតាមមាត្រា ៣៧៧ មាត្រា ៣៧៨ និង មាត្រា ៦២៩ នៃក្រមព្រហ្មទណ្ឌ ។
ជនសង្ស័យត្រូវបានចៅក្រមស៊ើបសួរសម្រេចឃុំខ្លួន ដាក់ពន្ធនាគារជាបណ្តោះអាសន្ន បន្ទាប់ពីបញ្ចប់ការសាកសួរ នៅព្រឹកថ្ងៃដដែលនោះ ៕
ដោយ ៖ រ៉ារ៉ា
