លោក ឡូយ សុផាត ៖ តម្លៃសន្តិភាពសម្រាប់ជីវភាពរស់នៅរបស់ប្រជាជន និងការអភិវឌ្ឍប្រកបដោយចីរភាពនៃកម្ពុជា

ចែករំលែក៖

ខេត្តស្ទឹងត្រែង ៖ លោក ឡូយ សុផាត សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាលគណបក្សប្រជាជនកម្ពុជា ចុះមូលដ្ឋានខេត្តស្ទឹងត្រែង នៅព្រឹកថ្ងៃទី៣០ ខែឧសភា ឆ្នាំ២០២២នេះ បានអញ្ជើញចូលរួមជាគណៈអធិបតីក្នុងពិធីប្រកាសបញ្ចូលសមាជិកគណបក្សប្រជាជនកម្ពុជាចំនួន៩៥រូប ចំណុះគណៈកម្មាធិការគណបក្សឃុំអូររៃ និងសំណេះសំណាលជាមួយសកម្មជនគណបក្សប្រជាជនកម្ពុជាឃុំអូរៃ ក្នុងកំឡុងពេលយុទ្ធនាការឃោសនារកសម្លេងឆ្នោតសម្រាប់ការបោះឆ្នោតក្រុមប្រឹក្សាឃុំ ស្ថិតនៅឃុំអូររៃ ក្នុងស្រុកថាឡាបរិវ៉ាត់ ខេត្តស្ទឹងត្រែង ដែលមានសមាសភាពចូលរួមសរុប ៥០០នាក់ ។

ជាកិច្វចាប់ផ្តើម លោកស្រី ហែម សាវី ប្រធានគណៈកម្មាធិការបក្សឃុំអូររៃ បានឡើងមានមតិស្វាគមន៍ និងបានរាយការណ៍អំពីសភាពការណ៍ទូទៅ និងការងារឃោសនាគោលនយោបាយបក្ស មានដូចជា ការចែកខិតប័ណ្ណ ការបិទផ្សាយរូបភាព ការផ្សព្វផ្សាយតាមឧឃោសនស័ព្ទ និងការជួបប្រជុំនានា ដើម្បីយកសំណូមមពរនានា និងការលំបាករបស់ប្រជាជនក្នុងជីវភាពរស់នៅ មកធ្វើការពិនិត្យ និងដោះស្រាយតាមលទ្ធភាពរបស់ថ្នាក់ឃុំ និងក្រុមការងារជួយឃុំ ផងដែរ។

បន្ទាប់មក លោក សួន ផុន អនុប្រធានបក្សស្រុក និងជាប្រធានគណៈចាត់តាំងបក្សស្រុក បានឡើងអានសេចក្តីសម្រេចស្តីពី ការយល់ព្រមបញ្ចូលសមាជិកគណបក្សប្រជាជនកម្ពុជាចំនួន៩៥រូបចំណុះគណៈកម្មាធិការបក្សឃុំអូររៃ។

ក្រោយពីអានសេចក្តីសម្រេចរួច លោក ឡូយ សុផាត បានប្រគល់សេចក្តីសម្រេចជូនសកម្មជនគណបក្សប្រជាជនកម្ពុជា ផងដែរ។ នាឱកាសនេះ លោក ឡូយ សុផាត ក៏បានឡើងមានមតិសំណេះសំណាល និងការផ្តាំផ្ញើការសាកសួរសុខទុក្ខពីថ្នាក់ដឹកនាំកំពូលនៃគណបក្សប្រជាជនកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ប្រធានគណបក្ស និងសម្តេចអគ្គមហាពញាចក្រី ហេង សំរិន ប្រធានកិត្តិយសគណបក្ស ដែលបានធ្វើឲ្យប្រទេសជាតិមានការរីកចម្រើនឥតឈប់ឈរលើគ្រប់វិស័យ ដោយសម្រេចបានសមិទ្ធផលធំៗ រហូតមកដល់ពេលនេះ គួរជាទីមោទនៈ ក្រោមដំបូលសន្តិភាពពេញលេញ។

លោកប្រធានក្រុមការងារ ក៏បានសង្កត់ធ្ងន់អំពីសារសំខាន់ និងតម្លៃសន្តិភាពសម្រាប់ជីវភាពរស់នៅរបស់ប្រជាជន និងការអភិវឌ្ឍប្រកបដោយចីរភាពនៃកម្ពុជា និងបានស្នើឲ្យគ្រប់គ្នា ត្រូវរួមគ្នាថែរក្សាឲ្យបាននូវសុខសន្តិភាព ក្រោមការដឹកនាំប្រកបដោយគតិបណ្ឌិត និងឈ្លាសវៃរបស់ សម្តេចតេជោ ហ៊ុន សែន នាយករដ្ឋមន្រ្តី ដែលមជ្ឈដ្ឋានជាតិ និងអន្តរជាតិតែងបានសាទរ និងកោតសរសើរខ្ពស់។

លោក ឡូយ សុផាត ក៏បានស្នើដល់បងប្អូនសមាជិកបក្សយើង ត្រូវខិតខំកែប្រែជីវភាពរស់នៅ តាមរយៈការបង្កបង្កើនផលដំណាំ ការបង្កើនចំណេះដឹង គំនិត ប្រាជ្ញា ស្មារតី នាំឲ្យមានការផ្លាស់ប្តូរការគិត ចេះច្នៃប្រឌិត ការកែច្នៃផលិតផលរបស់ខ្លួន នឹងនាំឲ្យមានការរីកចម្រើន ដោយសារមានទឹកស្រោចស្រព្វដំណាំ គួបផ្សំនឹងបច្ចេកទេសថ្មីទំនើបក្នុងការដាំដុះ ដែលនឹងទទួលបានទិន្នផលខ្ពស់ជាងមុន ឈានទៅបង្កើនវិស័យកសិ-ឧស្សាហកម្ម កសិ-ទេសចរណ៍ និងកសិ-ពាណិជ្ជកម្ម សម្រាប់លក់លើទីផ្សារជាតិ និងនាំចេញទៅបរទេស ក្នុងការជួយលើកកម្ពស់ជីវភាពរស់នៅរបស់បងប្អូន ផងដែរ។

លោកប្រធានក្រុមការងារ ក៏បានស្នើឲ្យបេក្ខជនក្រុមប្រឹក្សាឃុំទាំងអស់ ខិតខំបម្រើប្រជាពលរដ្ឋឲ្យបានកាន់តែសកម្ម និងល្អប្រសើរថែមទៀត សម្រាប់ភាពសុខសាន្ត និងភាពរីកចម្រើនក្នុងមូលដ្ឋានរបស់ខ្លួន និងបានស្នើឲ្យមានការចូលរួមបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៥ ដែលនឹងប្រព្រឹត្តទៅនាថ្ងៃទី០៥ ខែមិថុនា ឆ្នាំ២០២២ ខាងមុខនេះ គឺបោះឆ្នោតជូនគណបក្សប្រជាជនកម្ពុជា ដើម្បីបន្តអភិវឌ្ឍប្រទេសជាតិឲ្យកាន់តែមានការរីកចម្រើន និងសម្បូររុងរឿងថែមទៀត៕