សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ ព្រះសង្ឃនិងប្រជាពុទ្ធបរិស័ទ ចំណុះ ជើងវត្ត ៥២ អង្គ/នាក់ ត្រូវបានក្រុមគ្រូពេទ្យសង្គ្រោះបន្ទាន់ ក្រោយពីបានពុលចំណីអាហារនៅក្នុងវត្ត នាថ្ងៃសីលវេលាម៉ោង ១០ និង ៣០ នាទី ព្រឹក កាលពីថ្ងៃទី ៣០ ខែឧសភា ឆ្នាំ ២០២២ នៅចំណុចក្នុងបរិវេណវត្ត សំរោងលើ ក្នុងឃុំឆ្នាលមាន់ ស្រុកគាស់ក្រឡ ខេត្តបាត់ដំបង ។
បើតាមការរៀបរាប់ពីអ្នកជំងឺមួយចំនួន ដែលកំពុងសម្រាកព្យាបាលក្នុងមន្ទីរពេទ្យបង្អែកស្រុកមោងឫស្សី បាននិយាយថា កាលព្រឹកថ្ងៃទី៣០ខែឧសភាឆ្នាំ ២០២២នេះ គឺជាថ្ងៃសីល ដូច្នេះហើយទើបពុទ្ធបរិស័ទចំណុះជើងវត្ត បានមូលមតិគ្នារៀបចំធ្វើបាញ់ហយ ដើម្បីប្រគេនព្រះសង្ឃឲ្យប្លែកមាត់ម្តង។ ប្រភពដដែលបានបន្តថា លុះក្រោយពីព្រះសង្ឃឆាន់រួច និងប្រជា ពលរដ្ឋទាំងអស់ក៏បានចាប់ផ្តើមនាំគ្នាបរិភោគយ៉ាងឆ្ងាញ់ពិសា ប៉ុន្តែមិនបានប៉ុន្មាននាទីផង ទាំងព្រះសង្ឃក៏ដូចជាពុទ្ធបរិស័ទចាប់ផ្តើមមានអាការៈក្អួតចង្អោរ និងរាករូសឥតឈប់ឈរ ទើបអាជ្ញាធរចាត់រថយន្តដឹកបញ្ជូនទៅកាន់មន្ទីរពេទ្យបង្អែកស្រុកមោងឫស្សី ដើម្បីសង្គ្រោះ ដែលក្នុងនោះសរុបចំនួន ៥២ អង្គ/នាក់ គឺព្រះសង្ឃ ៤ អង្គ និងប្រជាពលរដ្ឋដែលក្នុងនោះស្រីចំនួន ៣០ នាក់និងប្រុស ១៨ នាក់ ។
បើតាមការអះអាងពីក្រុមគ្រូពេទ្យបានបញ្ជាក់ថា បញ្ហានេះគឺអាចបណ្តាលមកពីបន្លែឆៅដែលផ្ទាប់នៅក្នុងបាញ់ហយ ដែលលាងមិនស្អាត ទើបបណ្តាលឲ្យមានការឆ្លងបាក់តេរី ទៅក្នុងខ្លួនមនុស្ស។
នៅព្រឹកថ្ងៃទី ៣១ ខែឧសភា នេះដែរ កម្លាំងការិយាល័យបច្ចេកទេស និងកោសល្យវិច័យ បានត្រៀមចុះទៅកាន់កន្លែងកើតហេតុហើយ ដើម្បីស្រាវជ្រាវ និងសិក្សាលើបញ្ហានេះថា តើដើមចម គឺបណ្ដាលមកពីអ្វី៕
ដោយ៖ សូរិយា
